बारामतीत रविवारी पोलिओ लसीकरण

बारामती, ता. ७ : पुणे जिल्हा परिषद आणि पंचायत समिती आरोग्य विभाग यांच्या सयुंक्त विद्यमाने तालुक्यात रविवारी (ता. १२) पल्स पोलिओ लसीकरण मोहीम राबविण्यात येणार आहे. यामध्ये तालुक्यातील शून्य ते पाच वर्षे वयोगटातील सर्व बालकांचे पल्स पोलिओ प्रतिबंधक लसीकरण करण्यात येणार असल्याची माहिती तालुका आरोग्य अधिकारी डॉ. मनोज खोमणे यांनी दिली. तालुक्यात ग्रामीण भागातील २५ हजार ४१८ आणि शहरी भागातील आठ हजार १२४ असे एकूण ३३ हजार ५५२ बालकांना लसीकरण करण्याचे नियोजन केले आहे. यामध्ये ऊसतोड कामगार, वीट भट्टी कामगार, बस व रेल्वे स्थानक, जिल्ह्याच्या सीमा या ठिकाणी विशेष लसीकरण कक्ष स्थापन केले आहेत. एकही बालक पोलिओ लसीकरणापासून वंचित राहणार नाही, याबाबत दक्षता घेण्यात येत आहे. पोलिओ लसीकरणाकरिता २८२ बूथ उभारले जाणार आहेत. या साठी ६६८ कर्मचारी, आरोग्य कर्मचारी, अंगणवाडी सेविका, आशा स्वयंसेविका तसेच स्थानिक स्वयंसेवी संस्था सहभागी होणार आहे. या मोहिमेअंतर्गत लसीकरणापासून वंचित राहिलेल्या बालकांना १४ ते १६ ऑक्टोबर या कालावधीत गृहभेटीद्वारे पोलिओ लसीकरण करण्यात येणार आहे.