पवार कुटुंबीय यंदा दिवाळी साजरी करणार नाहीत : सुळे

बारामती, ता. १६: पवार कुटुंबीय यंदा गोविंदबाग येथे दिवाळी साजरी करणार नाही. याबाबत खासदार सुप्रिया सुळे यांनी समाजमाध्यमाद्वारे ही माहिती दिली आहे. याबाबत दिलेल्या निवेदनामध्ये सुप्रिया सुळे म्हणतात, आमच्या काकी भारती प्रतापराव पवार यांचे नुकतेच निधन झाले. त्या आम्हा सर्वांसाठी आईसमान होत्या. म्हणूनच सर्व पवार कुटुंबीयांनी मिळून यावर्षीची दिवाळी साजरी न करण्याचा निर्णय घेतला आहे. त्यामुळे दरवर्षी गोविंदबाग, बारामती येथे होणारी दिवाळी आणि दिवाळीच्या पाडव्यानिमित्त होणारा सहृदांच्या भेटीचा कार्यक्रम देखील यावर्षी होणार नाही. कृपया आपण सर्वांनी याची नोंद घ्यावी. आपणा सर्वांना ही दिवाळी आनंदाची, सुखसमृद्धीची आणि भरभराटीची जावो ही सदिच्छा.
दरवर्षी दिवाळीला संपूर्ण राज्यातून पाडव्याला पवार कुटुंबीयांना भेटण्यासाठी हजारो लोक येतात. मात्र, यंदा दिवाळी साजरी न करण्याचा निर्णय घेतला आहे.