बारामतीत तलवार, कोयत्यासह एकास अटक

बारामती, ता. २४ : एमआयडीसी परिसरात दहशत माजविण्याच्या उद्देशाने बेकायदा तलवार आणि लोखंडी कोयता बाळगणाऱ्या व गुन्ह्याच्यावेळी या हत्यारांचा वापर करणाऱ्या समर्थ सिद्ध मल्हारे (रा. मालुसरेवस्ती, वंजारवाडी, ता. बारामती) यास बारामती तालुका पोलिसांनी अटक केली आहे.
तालुका पोलिस ठाण्याच्या हद्दीतील दुसऱ्या एका गुन्ह्यातील आरोपींचा शोध घेत असताना बारामती तालुका पोलिसांना समर्थ मल्हारे हा तलवार बाळगत असल्याची गोपनीय माहिती मिळाली. त्यानंतर पोलिस निरीक्षक चंद्रशेखर यादव यांच्या मार्गदर्शनाखाली तालुका पोलिसांनी एमआयडीसी परिसरात छापा टाकून मल्हारे यास ताब्यात घेतले. चौकशीत त्याने तलवार घरी ठेवल्याचे सांगितल्यावर पोलिसांनी त्याच्या घराची झडती घेतली असता एक तलवार आणि लोखंडी कोयता सापडला. या प्रकरणी तालुका पोलिस ठाण्यात भारतीय हत्यार कायद्यानुसार गुन्हा नोंदविला आहे. पोलिस अधीक्षक संदीपसिंह गिल, अतिरिक्त पोलिस अधीक्षक गणेश बिरादार, उपविभागीय अधिकारी सुदर्शन राठोड यांच्या मार्गदर्शनाखाली पोलिस निरीक्षक चंद्रशेखर यादव, साहाय्यक निरीक्षक विक्रम पवार, उपनिरीक्षक कल्याण शिंगाडे, अंमलदार केदारनाथ बिडवे, दादा दराडे, किशोर वीर, नीलेश वाकळे, विलास खाडे, रवींद्र सोनवलकर, राहुल लांडगे यांच्या पथकाने ही कामगिरी केली.