बारामतीत दुसऱ्या दिवशी एकही अर्ज नाही

बारामती, ता. ११ : येथील नगरपरिषदेच्या निवडणूकीसाठी उमेदवारी अर्ज दाखल करण्याच्या दुसऱ्या दिवशी (ता. ११) एकही अर्ज दाखल झाला नसल्याची माहिती नगरपरिषद सूत्रांनी दिली. सध्या इच्छुकांची कागदपत्रे जमा करण्याची धावपळ सुरू आहे.
आपला अर्ज अचूक असावा, कोणत्याही तांत्रिक बाबीवर तो नामंजूर होऊ नये या दृष्टीने तयारी सुरु केल्याचे चित्र दोन दिवसात पाहायला मिळाले. एकीकडे उमेदवारी अर्ज दाखल करण्याची धावपळ तर दुसरीकडे प्रभागांमधील प्रमुखांच्या गाठीभेटी घेण्यासह आपल्याला उमेदवारी कशी मिळेल याचा प्रयत्न करणे याबाबी करण्यावर उमेदवार भर देत आहेत. नगराध्यक्षपदाच्या जागेसाठी सर्वाधिक रस्सीखेच असून सर्वच राजकीय पक्षाच्या उमेदवारांकडून या जागेवर आपली वर्णी लागावी यासाठी जोरदार मोर्चेबांधणी होत आहे.