बारामतीतील उमेदवाराची सर्वोच्च न्यायालयात धाव

बारामती, ता. १३ : येथील नगरपरिषद निवडणुकीसाठी मुंबई उच्च न्यायालयाने उमेदवारी अर्ज फेटाळल्यानंतर भाजपचे उमेदवार सतीश फाळके यांनी सर्वोच्च न्यायालयात धाव घेतली आहे. प्रशासकीय त्रुटींमुळे उमेदवाराचा मूलभूत हक्क हिरावला गेल्याची बाब मांडत फाळके यांनी सर्वोच्च न्यायालयात हा मुद्दा नेला आहे. याबाबत सर्वोच्च न्यायालय काय निर्णय घेते याकडे आता सर्वांचे लक्ष आहे.
वेळेत निवडणूक निर्णय अधिकाऱ्यांच्या दालनात हजर होऊनही उमेदवारी अर्ज स्वीकारला नाही, या मुद्द्यावर सतीश फाळके, अविनाश गायकवाड व अलीअसगर या तिघांनी बारामतीच्या अतिरिक्त जिल्हा व सत्र न्यायालयात दाद मागितली होती. न्यायालयाने निवडणूक निर्णय अधिकाऱ्यांना या तिघांचे अर्ज स्वीकारण्याचे आदेश दिले होते. यानंतर सतीश फाळके व अविनाश गायकवाड या दोघांनीच अर्ज दाखल केले. त्यानंतर नऊ दिवसांनी निवडणूक आयोगाच्या वतीने निवडणूक निर्णय अधिकारी संगीता राजापूरकर यांनी मुंबई उच्च न्यायालयात या निर्णयाला आव्हान दिले. मुंबई उच्च न्यायालयाने निवडणूक आयोगाचा युक्तिवाद मान्य करत बारामतीच्या न्यायाधीशांच्या अधिकारक्षेत्राबाहेरील हे प्रकरण असल्याचे मान्य करत या दोन्ही उमेदवारांची उमेदवारी ग्राह्य न धरण्याचे आदेश दिले होते. याबाबत २१ डिसेंबरला अंतिम सुनावणी घेतली जाणार आहे. दरम्यान, निवडणूक निर्णय अधिकाऱ्यांनी स्वतः:च्या निर्णयाविरुद्ध उच्च न्यायालयात जाणे हीच बाब मुळीच कायद्याला विसंगत असल्याचे सतीश फाळके यांनी नमूद केले आहे.