बारामतीत किरकोळ वादातून युवकाचा दगडाने ठेचून खून

बारामती, ता. १५ : किरकोळ वादावादीच्या प्रकारातून चिडून दोघांनी एका युवकाचा दगडाने ठेचून खून केल्याची धक्कादायक घटना बारामतीत घडली. शहरातील लेंडीपट्टीजवळ असलेल्या मोकळ्या मैदानात रविवारी (ता. १४) रात्री साडेअकरा वाजता ही घटना घडल्याची माहिती पोलिस निरिक्षक श्रीशैल्य चिवडशेट्टी यांनी दिली.
या घटनेमध्ये अविनाश उर्फ माऊली धनंजय लोंढे (वय २०, रा. मळद, बारामती) यांचा मृत्यू झाला. या प्रकरणी बारामती शहर पोलिसांनी समीर इक्बाल शेख (वय २५, रा. देवळे पार्क सोसायटी, बारामती) आणि प्रथमेश राजेंद्र दळवी (वय २०, रा. जगतापमळा, बारामती) या दोघांना अटक केली आहे. या प्रकरणी धनंजय प्रभाकर लोंढे यांनी पोलिसात फिर्याद दिली आहे.
याबाबत पोलिस सूत्रांनी दिलेल्या माहितीनुसार, दोन्ही आरोपी व मृत्यूमुखी पडलेले अविनाश लोंढे हे तिघेही लेंडीपट्टी येथील मोकळ्या जागेत बसलेले होते. त्याच वेळेस त्यांच्यामध्ये काही कारणाने वादावादी झाली. त्याचे पर्यवसान भांडणात झाल्यानंतर समीर शेख व प्रथमेश दळवी या दोघांनी अविनाश लोंढे यांच्या डोक्यात दगड घातल्याने त्यांचा मृत्यू झाला. उपविभागीय पोलिस अधिकारी डॉ. सुदर्शन राठोड यांनी घटनास्थळी भेट देत मार्गदर्शन केले.