बारामतीत ‘राष्ट्रवादी’कडून सोशल इंजिनिअरिंगचा प्रयोग

बारामती, ता. १४ : येथील नगरपरिषदेच्या चार स्वीकृत नगरसेवकांच्या जागेसाठी मोठी रस्सीखेच पाहायला मिळाली. नुकत्याच झालेल्या निवडणुकीच्या पार्श्वभूमीवर बारामतीत सोशल इंजिनिअरिंगचा प्रयोग राबविण्याचा प्रयत्न उपमुख्यमंत्री अजित पवार यांनी केला आहे. मिळालेल्या माहितीनुसार, बारामती नगरपरिषदेच्या स्वीकृत सदस्यपदी राहुल वाघोलीकर, सोमनाथ गजाकस, गणेश जोजारे व अमोल कावळे या चार जणांना संधी देण्याचा निर्णय घेतला आहे.
बारामती नगरपरिषदेच्या नुकत्याच झालेल्या निवडणुकीत राष्ट्रवादी कॉंग्रेस पक्षाने निर्विवाद वर्चस्व प्राप्त केले. सहा जागा विरोधात निवडून आल्या असल्या, तरी राष्ट्रवादीचा गट स्थापन करताना सहापैकी तीन जणांनी पक्षाला पाठिंबा दिल्याने राष्ट्रवादीची ताकद आणखी वाढली आहे.
निवडणुकीतील भाषणादरम्यानच अजित पवार यांनी ज्या समाजास प्रतिनिधित्व मिळालेले नाही, अशांना स्वीकृत सदस्यपदाच्या माध्यमातून प्रतिनिधित्व देण्याचा शब्द दिला होता. त्यानुसारच या चार जणांना संधी देण्यात आली आहे, असे राजकीय वर्तुळात मानले जात आहे. पुढील चार वर्षात आणखी काही उपेक्षित समाजघटकातील प्रतिनिधींना स्वीकृत नगरसेवक म्हणून सामावून घेतले जाणार असल्याचे संकेत पक्षाच्या वतीने देण्यात आले आहेत.
दरम्यान, शुक्रवारी (ता. १६) अधिकृतपणे नगरपरिषदेच्या सभेत या चारही नावांवर शिक्कामोर्तब होणार आहे. उपनगराध्यक्षपदीही कोणाला संधी दिली जाते, याकडेही सर्वांचे लक्ष लागून राहिले आहे.