कंपनीचे नुकसान केल्याप्रकरणी भांबोलीतील ५ जणांना अटक

चाकण, ता. ३ : येथील औद्योगिक वसाहतीतील भांबोली (ता. खेड) येथील कोरल लॉजिस्टिक्स असेस्ट इंडिया प्रा. लिमिटेड कंपनीच्या आवारात कंपनीची सुरक्षाभिंत, तसेच रस्त्याचे व एमएनजीएल गॅस वाहिनीचे नुकसान केल्याप्रकरणी कंपनीच्या वतीने पोलिसात फिर्याद दिल्यानंतर आरोपी चैतन्य सयाजी वाडेकर (वय २९), अमोल सयाजी वाडेकर (वय ३१), प्रमोद सयाजी वाडेकर (वय ३३, तिघेही रा. भांबोली) व इतर दोघे अशा पाच जणांना अटक केली आहे. आरोपी वाडेकर व इतर अनोळखी दहा ते पंधरा साथीदार यांच्यावर विविध कलमानुसार गुन्हा दाखल केला आहे, अशी माहिती महाळुंगे पोलिस ठाण्याचे वरिष्ठ पोलिस निरीक्षक नितीन गीते यांनी दिली. दरम्यान, गुन्हा दाखल झालेले चैतन्य वाडेकर हे युवा कीर्तनकार म्हणून ओळखले जातात.
पोलिसांनी दिलेल्या माहितीनुसार, हा प्रकार बुधवारी (ता. २) रात्री दोन ते पहाटे पावणेचारच्या दरम्यान घडला. पोलिसांत फिर्याद कंपनीच्या वतीने अजित पाटील (सध्या रा. चिंचवड) यांनी दिली. फिर्यादीच्या कंपनीच्या लगत आरोपी वाडेकर यांची इमारत आहे. आरोपी तसेच इतरांनी कायदा गर्दी जमाव जमविला. जेसीबी व पोकलेनच्या साह्याने कंपनीच्या गेटमध्ये अनाधिकृतपणे प्रवेश केला व कंपनीची पूर्व दिशेला असलेली सुरक्षा भिंत, तसेच उत्तर दिशेला असलेली सुरक्षा भिंत पूर्णपणे पाडून नुकसान केले. चाकण- आंबेठाण रस्त्यावरून कंपनीकडे जाणारा रस्ता जेसीबी व पोकलेनच्या साह्याने खोदला. त्यावर मोठमोठे खड्डे पाडले. जलवाहिनी फोडली. विद्युत पुरवठा करणाऱ्या वाहिन्या तोडल्या. निष्काळजीपणे नुकसान केले. तसेच, एमएनजीएलची गॅस वाहिनी तोडली. त्यामुळे गॅस गळती होऊन कंपनीच्या आवारात व लगतच्या परिसरात गॅस पसरला व लोकांच्या जीवितास धोका निर्माण झाला, असे फिर्यादीत म्हटले आहे.