चाकण- तळेगाव मार्गावरील पूल धोकादायक

चाकण, ता. २२ : चाकण- तळेगाव मार्गावरील महाळुंगे, खालुंब्रे (ता. खेड) या दोन्ही गावांच्या ओढ्यावरील दगडी बांधकामातील पूल सव्वाशे वर्षांपूर्वीचा ब्रिटिशकालीन आहेत. या मार्गाचे रुंदीकरण २० वर्षांपूर्वी झाले. त्यावेळी या पुलांची थोडी डागडुजी करण्यात आली. परंतु हे दोन्ही पूल अवजड वाहनांच्या वाहतुकीमुळे, औद्योगिक वसाहतीच्या मोठ्या रहदारीमुळे धोकादायक झाले आहेत. या पुलांची बांधकाम तपासणी कोण करेल का? हा सवाल प्रवासी व नागरिक करीत आहेत.
चाकण- तळेगाव मार्गावर महाळुंगे, खालुंब्रे या परिसरात चाकण औद्योगिक वसाहत मोठ्या प्रमाणात आहे. या औद्योगिक वसाहतीतील अवजड वाहनांचे कंटेनर, ट्रेलर, टँकर, तसेच बसेसची व इतर मोठी वाहतूक आहे. हा मार्ग मुंबई व मराठवाडा, नाशिककडे जात असल्यामुळे या मार्गावरून मोठ्या प्रमाणात इतर वाहनांची वर्दळ असते. त्यामुळे या दोन्ही पुलावरील वाहतूक धोकादायक झाली आहे. हे दगडी पूल सव्वाशे वर्षांपूर्वीचे आहेत, असे लोकांचे म्हणणे आहे. या दोन्ही पुलांची बांधकाम तपासणी संबंधित सार्वजनिक बांधकाम विभाग, एमएसआयडीसी ने यापूर्वी कधी केलीच नाही. ही तपासणी करावी अशी मागणी आहे, मात्र याकडे कोणाच लक्ष देत नाही.

महाळुंगे तसेच खालुंब्रे येथील दोन्ही पूल धोकादायक आहेत. या पुलावरून अगदी ५० टन वजनाचीही अवजड वाहने जातात, त्यामुळे हे पूल कधी कोसळतील सांगता येत नाही. या पुलावर मोठे खड्डे पडले आहेत, तसेच या पुलावरून मोठ्या प्रमाणात पावसाळ्यात पाणी वाहते. त्यामुळे पुलांच्या दगडी मोऱ्यांना धोका निर्माण झालेला आहे. काही ठिकाणी तडे गेले आहेत. त्यामुळे संबंधित सार्वजनिक बांधकाम विभागाने, तसेच महसूल, पोलिस प्रशासन यांनी याकडे लक्ष द्यावे अशी मागणी आहे.
-चंद्रकांत इंगवले, स्थानिक नागरिक

८६५१