बाह्यवळण मार्ग कधी होणार?

चाकण, ता. २६ : चाकणच्या वाहतूक कोंडीला पर्याय असणारा चाकणचा एकमेव बाह्यवळण मार्ग रासेफाटा ते कडाचीवाडी, मेदनकरवाडी, गवते वस्ती पुणे- नाशिक महामार्गाला जोडणारा आहे. गेल्या ३० वर्षापासून हा मार्ग मात्र लालफितीत अडकला आहे. या मार्गाला मंजुरी मिळाली असली तरी पीएमआरडीए हा मार्ग कधी करणार? असा प्रश्न येथील नागरिक, प्रवासी आणि ग्रामस्थांना पडला आहे.
चाकण औद्योगिक वसाहतीमुळे येथे सतत मोठ्या प्रमाणावर अवजड वाहतूक सुरू असते. पुणे- नाशिक महामार्गासह चाकण- तळेगाव व चाकण- शिक्रापूर रस्त्यावर मोठ्या प्रमाणात वाहतूक कोंडीचा अनुभव नागरिक, कामगार, विद्यार्थी, महिला व व्यापाऱ्यांना दररोज येतो. गेली २० वर्षे ही समस्या सुरूच आहे, मात्र अद्याप कायमस्वरूपी उपाययोजना झालेली नाही.
बाह्यवळण मार्ग हा या कोंडीवर उपाय ठरू शकतो. या मार्गासाठी पीएमआरडीएकडून हद्दी निश्चित केल्या गेल्या आहेत आणि निधीही राखीव ठेवण्यात आला आहे. तरीसुद्धा प्रत्यक्ष काम सुरू करण्याकडे प्राधिकरणाचे दुर्लक्ष असल्याची भावना नागरिकांतून व्यक्त होत आहे.

शेतकरी, कामगार, उद्योजकांमध्ये नाराजी
या मार्गाची प्रतीक्षा करणाऱ्या स्थानिक नागरिक, कामगार, उद्योजक व शेतकऱ्यांमध्ये प्रचंड नाराजी आहे. मार्ग मंजूर आहे, हद्दी ठरल्या आहेत, निधीही राखीव आहे, तरीसुद्धा काम सुरू होत नाही, हे दुर्दैवी आहे, अशी भावना अनेकांनी व्यक्त केली.

याबाबत मेदनकरवाडीचे सरपंच अमोल साळवे, उपसरपंच महेंद्र मेदनकर, ॲड. संकेत मेदनकर यांनी सांगितले की, ‘‘बाह्यवळण मार्ग करण्याकडे पीएमआरडीएचे अजिबात लक्ष नाही. हा मार्ग झाल्यास अवजड वाहने कंटेनर, टेलर, ट्रक, टँकर, बस या मार्गाने जातील व इतरही वाहने जातील. त्यामुळे अपघात कमी होतील. वाहतूक कोंडी होणार नाही. त्यामुळे पीएमआरडीएच्या आयुक्तांनी, तसेच शासनाने तत्काळ याकडे लक्ष द्यावे अशी आमची मागणी आहे.

बाह्यवळण मार्ग गेली ३० वर्षे फक्त फाइलमध्येच आहे. हद्दी निश्चित असूनही काम होत नाही, हे लोकप्रतिनिधींच्या निष्क्रियतेचे आणि प्रशासनाच्या उदासीनतेचे द्योतक आहे.
- नवनाथ भुजबळ, शेतकरी व सामाजिक कार्यकर्ते