शेलगाव- आळंदी रस्त्यावर वाहनांच्या रांगा

चाकण, ता. २९ : शेलगाव ते आळंदी या रस्त्यावर ३०० मीटर सिमेंट काँक्रिटीकरणाचे काम चालू आहे. रस्त्याचे काम सुरू असल्याने रस्ता अरुंद झाला आहे. त्यामुळे ये- जा करणाऱ्या वाहनांच्या रांगा लागत आहेत. हे काम लवकर पूर्ण करावे, अशी मागणी सामाजिक कार्यकर्ते भुदेव शिंदे, रामहरी आवटे व नागरिकांनी केली आहे.
शेलगाव फाटा शेलगाव ते वडगावघेणंद (ता. खेड) या रस्त्यावरील डांबरीकरणाचे काम केले आहे. परंतु राहिलेले ३०० मीटरचे सिमेंट काँक्रिटीकरणाचे काम हे सखल भागातील रस्त्यावर करण्यात येत आहे. या रस्त्याची रुंदी पहिली साडेपाच मीटर होती, आता ती सात मीटर केली आहे. रुंदी वाढविण्यात आली आहे. परंतु सखल भागात सिमेंट काँक्रिटीकरणाचे काम सुरू आहे. हे काम निकृष्ट होत असल्याचा आरोप नागरिकांकडून करण्यात येत आहे.
या रस्त्याचे काम होत असताना दोन्ही बाजूकडील वाहतूक नियंत्रित करण्यासाठी ठेकेदाराने दोन कर्मचारी नियोजनासाठी ठेवायला पाहिजे, परंतु ते ठेवले जात नाहीत. त्यामुळे दोन किलोमीटरपर्यंत वाहनांच्या रांगा लागत आहेत. त्यामुळे शेतकरी, व्यापारी, कंपनीत जाणारे कामगार, रुग्ण, विद्यार्थ्यांना त्रासाला सामोरे जावे लागत आहे.
याबाबत सामाजिक कार्यकर्ते भुदेव शिंदे, रामहरी आवटे यांनी सांगितले की, ‘‘हे काम चांगल्या पद्धतीने, तसेच लवकर करण्यात यावे. काम करत असताना दोन कर्मचारी दोन्ही बाजूला वाहतूक नियंत्रित करण्यासाठी ठेवावीत. या कामाकडे सार्वजनिक बांधकाम विभागाचे अधिकारी , संबंधित ठेकेदार यांनी लक्ष द्यावे.’’

हे काम चांगल्या पद्धतीने होत आहे. वाहतूक नियंत्रित करण्यासाठी ठेकेदार त्यांच्या पद्धतीने कर्मचारी ठेवत आहेत. या रस्त्यावरील सिमेंट काँक्रिटची उंची एक फूट आहे.
- संतोष पवार, शाखा अभियंता, सार्वजनिक बांधकाम विभाग