चाकण येथील कोंडीवर तातडीने उपाययोजना करा

चाकण, ता. १ : येथील पुणे - नाशिक महामार्ग, चाकण- तळेगाव, चाकण- शिक्रापूर, तसेच चाकण एमआयडीसी येथे होणाऱ्या वाहतूक कोंडीवर तातडीने उपाययोजना कराव्यात, अशा स्पष्ट सूचना सार्वजनिक बांधकाम मंत्री शिवेंद्रसिंहराजे भोसले यांनी संबंधित विभागांना दिल्या.
चाकण (ता. खेड) येथील औद्योगीक वसाहत व परिसरातील वाहतूक कोंडी सोडविण्याबाबत उपाययोजना राबवण्याविषयी मंत्रालयात बैठक झाली. त्यावेळी मंत्री भोसले बोलत होते. यावेळी बैठकीला आमदार महेश लांडगे, आमदार सुनील शेळके, आमदार बाबाजी काळे यांच्यासह संबंधित सर्व विभागांचे अधिकारी उपस्थित होते. पुणे नाशिक महामार्गावरील नाशिक फाटा ते खेड रस्त्याचे काम सुरू करण्यासाठी राष्ट्रीय महामार्ग प्राधिकरणास द्यावयाची पत्राची कार्यवाही तत्काळ करण्यात यावी, अशा सूचना देऊन मंत्री भोसले म्हणाले की, ‘‘चाकण एमआयडीसी क्षेत्रातील रस्त्यांवरील खड्डे एमआयडीसीने भरावेत आणि सार्वजनिक बांधकाम विभागाच्या अखत्यारीतील रस्त्यांवरील खड्डे भरण्याचे नियोजन करावे. वाहतूक कोंडी सोडवण्यासाठी तातडीची उपाययोजना म्हणून अस्तित्वातील रस्त्यावर आणखी एक मार्गिका तातडीने सुरू करावी. एमआयडीसीने त्यांचा ७५ मीटर रुंदीचा रस्ता तातडीने पूर्ण करण्याची कार्यवाही करावी. राष्ट्रीय महामार्ग प्राधिकरणाने त्यांची कामेही तातडीने करून वाहतूक कोंडी सोडविण्याच्या दृष्टीने कार्यवाही करावी. तळेगाव, चाकण, शिक्रापूर मार्गाच्या कामाबाबत स्थानिक लोकप्रतिनिधींना माहिती देऊन काम करावे.’’
येथील वाहतूक कोंडीला नागरिक, कामगार, उद्योजक संतापले आहेत. रस्त्याच्या रुंदीकरणाची कामे तात्पुरती मार्गी लावून रस्त्यावरील खड्डे तत्काळ बुजविण्यात यावे, अशा मागणी नागरिक आणि प्रवासी करीत आहेत.