हंगामातील पहिल्या बटाट्याची चाकणच्या बाजारामध्ये आवक

चाकण, ता. १४ : चाकण (ता .खेड) येथील महात्मा फुले बाजारात काढणी केलेल्या स्थानिक परिसरातील नवीन बटाट्याची तसेच इतर जिल्ह्यातील नवीन बटाट्याची वीस टन रविवारी (ता.१४) आवक झाली. नवीन बटाट्याला घाऊक बाजारात प्रतिकिलोला १५ ते १६ रुपये बाजारभाव मिळाला. पावसामुळे बटाट्याच्या उत्पादनात मोठ्या प्रमाणात यंदा घट झाली आहे. त्यामुळे शेतकऱ्यांचे आर्थिक नुकसान झाले आहे, असे काही शेतकरी तसेच व्यापाऱ्यांचे म्हणणे आहे.

पावसाने थोडी उघडीप दिल्यानंतर बटाट्याची काढणी केल्यानंतर विक्रीसाठी बटाट्याची आवक झाली. उंचावरील, पठारावरील जमिनीतील बटाट्यांच्या उत्पादनात घट आणि गुणवत्तेत घट झाली आहे. या महिन्यात बटाट्याचे भाव प्रतिकिलोला १५ ते १६ रुपये आहेत. बाजारात आज आग्रा येथील तसेच इंदोर तसेच गुजरात मधील लाल बटाट्याची सुमारे दोन हजार क्विंटल आवक झाली. इंदोर बटाट्याला घाऊक बाजारात प्रतिकिलोला वीस रुपये भाव मिळाला. तर गुजरात बटाटा नऊ ते अकरा रुपये प्रतिकिलोने बाजारात विकला जात आहे.

बटाटा विक्रेते राम गोरे, रमेश गोरे यांनी सांगितले की, सध्या बाजारात नवीन बटाट्याची थोड्या प्रमाणात आवक होत आहे. पावसाने अजून उघडीप दिल्यानंतर बटाटा काढणी वेगात सुरु होईल आणि आवक वाढेल. शेतकऱ्यांचा बटाट्याचा उत्पादन खर्च थोड्या प्रमाणात वसूल होत आहे .परंतु भाव वाढण्याची गरज आहे.

खेड कृषी उत्पन्न बाजार समितीचे सभापती विजय शिंदे ,उपसभापती क्रांती सोमवंशी ,सचिव बाळासाहेब धंद्रे यांनी सांगितले की," नवीन बटाट्याची आवक नुकतीच सुरू झाली आहे. बटाट्याचे भाव वीस रुपयाच्या खाली आहेत. बटाट्याचे भाव वाढले तर शेतकऱ्यांना आर्थिक दृष्ट्या परवडेल त्यामुळे भाव वाढण्याची गरज आहे.