वाहतूक कोंडीबाबत प्रशासनाकडून पावले

चाकण, ता. १८ : येथील पुणे- नाशिक, चाकण- शिक्रापूर मार्गावरील वाहतूक कोंडी सुरळीत करण्यासाठी माणिक चौकात खेडचे प्रांताधिकारी अनिल दौंडे यांनी गुरुवारी (ता. १८) भर पावसात पाहणी केली व वाहतूक कशी सुरळीत होईल, यासाठी संबंधित पोलिस अधिकाऱ्यांना सूचनाही दिल्या.
चाकण (ता. खेड) येथील माणिक चौकात काही पक्की बांधकामे पाडली आहेत. अजूनही काही बांधकामे व इतर अतिक्रमणे काढण्यात येणार आहे. प्रशासनाने चाकण बस स्थानकाची भिंत काढल्यानंतर तेथील जागा खाली केल्यानंतर त्या जागेवर काही हातगाडीवाले, पथारीवाले यांनी अतिक्रमण केलेले आहे. अतिक्रमण काढल्यानंतर ही जागा चौकात खुली केली आहे. तेथे मार्ग करण्यात यावा. त्या जागेवरून वाहने पोलिसांनी सोडवावी अशा सूचना प्रांताधिकाऱ्यांनी वाहतूक विभागाचे वरिष्ठ पोलिस निरीक्षक प्रमोद वाघ यांना दिल्या.
चाकण नगरपरिषद, नाणेकरवाडी ग्रामपंचायतीने अतिक्रमणांवर कारवाई केली पाहिजे. तसेच, रस्त्यावरील बाजार हटवला पाहिजे. पोलिसांनी रस्त्यावर वाहतुकीस अडथळा ठरणारा बाजार बसू देता कामा नये, त्यामुळे वाहतुकीस अडथळा होऊन अपघात होत आहे, असे प्रांताधिकाऱ्यांनी सांगितले. अतिक्रमण काढल्यानंतर मार्ग खुला होतो त्या ठिकाणी तत्काळ वाहतूक वळवली पाहिजे. त्यामुळे चौकात वाहतूक कोंडी होणार नाही, असेही त्यांनी स्पष्ट केले. यावेळी चाकणचे मंडलाधिकारी चेतन चासकर, तलाठी निवृत्ती गवारी उपस्थित होते.

हातगाडीवाले दादागिरी करतात
माणिक चौकात मोठ्या प्रमाणात हातगाड्या आहेत. त्या हातगाड्या काही लोक चालवतात त्यांच्याकडून हप्ते घेतात. त्यामुळे मार्गावर वाहतुकीसाठी हातगाड्यांचा मोठ्या प्रमाणात अडथळा होतो. त्याबाबत कोणी आवाज उठवला तर त्यांची दादागिरी आहे. त्यामुळे प्रशासन नेमके त्यांच्याबाबत काय पाऊल उचलते? पोलिस अधिकारी कर्मचारीही हातगाड्या हटविण्याबाबत हयगय करतात. याकडे नगर परिषद, नाणेकरवाडी ग्रामपंचायतीने लक्ष द्यावे, असे नागरिकांचे म्हणणे आहे.

CHN25B09333