चाकणला पाचशे टन गोंड्याची आवक

चाकण, ता. १ : येथील महात्मा फुले बाजार (ता.खेड) आवारात तसेच शहरात मराठवाड्यातील जिल्ह्यातून हिंगोली, परभणी तसेच विदर्भातील बुलढाणा जिल्ह्यातून झेंडूच्या फुलांची, केशरी, पिवळ्या गोंड्याची मोठ्या प्रमाणात बुधवारी (ता.१) आवक झाली. झेंडूस प्रतिकिलोला ५० ते १०० रुपये प्रतिकिलोपर्यंत बाजारभाव मिळाले.

सातारा, सांगली, नाशिक, अहिल्यानगर तसेच पुणे जिल्ह्यातूनही गोंड्याची, झेंडूच्या फुलांची मोठ्या प्रमाणात आवक झाली ही आवक सुमारे पाचशे टन झाली. झेंडूच्या, गोंड्याच्या फुलांना मोठी मागणी राहिली. चाकण येथील औद्योगिक वसाहतीमुळे विविध कंपन्यात आज खंडेनवमीनिमित्ताने पूजेसाठी फुलांना मोठी मागणी होती. उद्याच्या दसऱ्यासाठी सजावटीसाठी तसेच पूजेसाठी झेंडूची फुले गोंड्याच्या फुलांना मोठी मागणी होती. बाजारात स्थानिक परिसरातून तसेच मुंबई,पुणे, पिंपरी चिंचवड ,मोशी , भोसरी लोणावळा , पनवेल ,खोपोली भागातून व्यापारी ग्राहकांची मोठी मागणी राहिली. राजेश चव्हाण या गोंडा उत्पादक शेतकऱ्यांनी सांगितले की, मराठवाड्यातून आम्ही दसऱ्यानिमित्ताने फुले विक्रीसाठी वाहनातून आणली आहेत. दहा तासांच्या प्रवासानंतर येथे आलो आहे. त्यामुळे काही गोंडा काळा पडून नुकसानही होत आहे.

09440