कोयाळी येथे पिंजऱ्यात जेरबंद

चाकण, ता. ११ : चाकण वनपरिक्षेत्राच्या हद्दीतील कोयाळी (ता. खेड) येथे परिसरात फिरणारा बिबट्या पकडण्यासाठी बुधवारी (ता. १०) पिंजरा लावण्यात आला होता. त्या पिंजऱ्यात गुरुवारी (ता. ११) पहाटेच्या सुमारास अखेर बिबट्या अडकला, अशी माहिती चाकण वनपरिक्षेत्राचे अधिकारी संतोष यांनी दिली.
या बिबट्याने कोयाळी गावच्या हद्दीत मंगळवारी (ता. ९) सुदाम वाघोले यांच्या कालवडीवर हल्ला करून तीला जखमी केले होते. त्यानंतर ग्रामस्थांनी वनविभागाकडे पिंजरा लावण्याची मागणी केली होती. त्याची तत्काळ वन अधिकाऱ्यांनी दखल घेतली व शेतकरी दत्तात्रेय भाडळे यांच्या मालकीच्या शेतात बिबट्या पकडण्यासाठी पिंजरा लावला होता. हा पिंजरा जुन्नरचे उपवनसंरक्षक प्रशांत खाडे, सहाय्यक वनसंरक्षक अमृत शिंदे, वनपरिक्षेत्र अधिकारी संतोष कंक यांच्या मार्गदर्शनाखाली लावला होता. त्यामध्ये गुरुवारी पहाटेच्या सुमारास सात वर्ष वयाचा नर बिबट्या अडकला. बिबट्या पिंजऱ्यात अडकल्याची माहिती मिळताच वनपरिक्षेत्र चाकणची रेस्क्यू व्हॅन, तसेच आळंदीचे वनपाल आनंदकुमार इंदलकर, वनरक्षक नवनाथ पगडे, धनराज तोंडे, अजय कोळेकर, अक्षय काळे घटनास्थळी दाखल झाले. हा बिबट्या पकडण्यासाठी विकास भिवरे, अर्जुन गायकवाड, संजय बनसोडे, सुदाम वाघोले व गावातील इतर ग्रामस्थांनी सहकार्य केले. हा बिबट माणिक डोह येथील बिबट निवारण केंद्र पाठविण्यात आला आहे.

09877