बहुप्रतिक्षित निविदा अखेर खुल्या

चाकण, ता.३१ : तळेगाव चाकण शिक्रापूर (548D) या एकूण ५४ किलोमीटर अंतराच्या महामार्गाचे काम अखेर मार्गी लागले आहे. या कामाच्या निविदा मंगळवारी (ता. ३० डिसेंबर २०२५) एमएसआयडीसीच्या वतीने खुल्या करण्यात आल्या. तळेगाव-चाकण-शिक्रापूर या महामार्गाचे काम सुमारे ३१०० कोटी रुपये खर्चाचे आहे. या कामासाठी एकूण चार कंपन्यांनी निविदा भरलेल्या होत्या. यात मोंटेकार्लो लिमिटेड कंपनीने बाजी मारली आहे.
तळेगाव-चाकण-शिक्रापूर या महामार्गाचे काम व्हावे अशी अनेक वर्षांपासून मागणी होती. हा मार्ग सार्वजनिक बांधकाम प्रकल्प विभागाकडून महाराष्ट्र राज्य पायाभूत विकास महामंडळाकडे गेला. त्यानंतर एमएसआयडीसीने या मार्गाचे काम होण्यासाठी हालचाली केल्या. या मार्गाच्या निविदा खुल्या करण्याच्या वेळा अनेक वेळा पुढे ढकलण्यात आल्या. या मार्गाच्या निविदा अखेर एमएसआयडीसीने खुल्या केलेल्या आहेत. यामध्ये मोंटेकार्लो लिमिटेड या कंपनीला हे काम देण्यात आलेले आहे. हे काम बांधा, वापरा, हस्तांतरित करा (बीओटी) तत्त्वावर होणार आहे. तळेगाव-चाकण-शिक्रापूर हा महामार्ग औद्योगिक वसाहतीतून जातो त्यामुळे या महामार्गाला अतिशय महत्त्व आहे. औद्योगिक वसाहतीमुळे या महामार्गावरील वाहतूक मोठ्या प्रमाणात आहे. या महामार्गावर अवजड वाहनांची संख्या मोठी आहे तसेच इतर वाहनांची संख्या मोठी आहे या महामार्गाचे काम होत नसल्यामुळे या महामार्गावर सातत्याने अपघात होतात त्यात अनेकांचे जीव गेलेले आहेत. विशेषतः: कामगारांचे जीव मोठ्या प्रमाणात गेलेले आहेत. त्यामुळे या महामार्गाचे काम व्हावे, अशी अनेक वर्षांपासून मागणी होती. एमएसआयडीसीने हा मार्ग ताब्यात घेतल्यानंतर या मार्गाचे काम मार्गी लागले आहे.

काम सहा महिन्यांनी सुरू होईल
या महामार्गावर टोलनाके असणार आहेत. तळेगाव ते चाकण रासे फाटा या सुमारे २४ किलोमीटरच्या अंतरात चार पदरी उड्डाणपूल होणार आहे तसेच उड्डाण पुलाच्या खाली चार पदरी रस्ता होणार आहे . तळेगाव ते चाकण असा एकूण आठ पदरी रस्ता उड्डाणपूल व जमिनीवर रस्ता मिळून होणार आहे. चाकण ते शिक्रापूर चार पदरी महामार्ग होणार आहेत. कंपनीला काम मिळाल्यानंतर हे काम साधारणपणे सहा महिन्यांनी सुरू होईल, असे संबंधित वरिष्ठ अधिकाऱ्यांनी सांगितले.