बिबट्याचा कुत्र्यावर कमान येथे हल्ला

चास, ता.२३ : कमान (ता. खेड) येथील लिंबगवळी वस्तीमध्ये पाळीव कुत्र्यावर बिबट्याने हल्ला केला व त्यास पळवून नेण्याचा प्रयत्न केला. मात्र, घरातील माणसांनी बाहेरचे दिवे लावून व आरडाओरडा करून कुत्र्यास बिबट्याच्या तावडीतून सोडविले.
कमान परिसरात बिबट्याचा वावर असून, गेली काही दिवसांपासून नागरिकांना त्याचे दर्शन होते आहे. पंधरा दिवसांपूर्वी एका शेतकऱ्याच्या शेतात पिकांना पाणी देत असताना पहाटे विद्युत पंप बंद करून तो पुन्हा शेताकडे गेला. असता शेतामध्ये नेमका बिबट्या बसलेला त्यांच्या दृष्टीस पडला. शेतकरी पती पत्नीने त्याला हुसकावण्याचा प्रयत्न केला परंतु त्याने जागा सोडली नाही. त्यामुळे पती पत्नीने आपल्या घरचा रस्ता धरला. वन विभागाने योग्य त्या उपाययोजना व जनजागृती करून या संदर्भात नागरिकांना सतर्क करणे गरजेचे आहे, त्याचप्रमाणे मानवी वस्तीला होणारा धोका टाळावा, असे आवाहन लाईफ जागतिक पर्यावरण संस्थेचे समन्वयक व पर्यावरण प्रेमी शिक्षक संजय नाईकरे यांनी केले आहे.