निसर्गाच्या सानिध्यातील चासमधील सोमेश्र्वर मंदिर

राजेंद्र लोथे : सकाळ वृत्तसेवा
चास, चास (ता. खेड) येथील ग्रामदैवत श्री सोमेश्र्वर मंदिर राजगुरुनगर पासून पश्चिमेस सुमारे दहा किमी अंतरावर असून भीमा नदीतीरावर वसलेले व सुंदर बगीच्या व निसर्गाच्या सानिध्यात असलेले सुंदर मंदिर आहे. या मंदिराची निर्मिती थोरल्या बाजीरावांच्या पत्नी काशिबाई यांनी केल्याचे सांगितले जाते.
काशीबाई यांची महादेवावर नितांत श्रद्दा होती. त्यामुळे त्यांनी चासला आपल्या माहेरी भीमा नदीच्या पवित्र तीरावर निसर्गाच्या सानिध्यात एक सुंदर व देखणा दगडी घाट बांधून घेतला. त्याचबरोबर गावाच्या पश्चिमेला भीमा नदी पात्राच्या व गावाच्या बाजूने डाव्या बाजूस पश्चिम दिशेला उत्कृष्ट घडीव दगडाचे सोमेश्र्वर महादेवाचे मंदिर बांधले. या मंदिराच्या समोरच भव्य पाषाणी दीपमाळ कि जी स्थापत्य शास्त्राचा उत्तम नमुना आहे. आजही दिमाखात उभी आहे. सोमेश्र्वराच्या पूजेने व्याधी, कलह, गृहकलह व आजार बरे होतात, विवीध संकटे निवारली जातात अशी काशीबाईंची गाढ श्रद्दा होती व ती आजही दर्शनाला जाणाऱ्या भाविकांना प्रचिती देते आहे. मंदिराच्या शेजारीच उभारलेले विठ्ठल-रखुमाई व साईबाबांचे मंदिर, दक्षीण भारतातील मंदिराच्या कळसाची रचना केलेले शितळा मातेचे मंदिर व पुरातन असलेले लघाटे यांचे गणेश मंदिर भव्य दिव्य स्वरूपात उभे आहे. मंदिराच्या बाजूला सुंदर बगीच्याची निर्मिती केलेली आहे. बगीच्यात केलेले कारंजे रात्रीच्या अंधारात विद्यूत रोषणाईने न्हाऊन निघतात. मंदिराच्या समोरच सरदार पाटणकरांनी उभारलेले भव्य लक्ष्मी- नारायणाचे सुवर्ण मंदिर असून मंदिरातील लक्ष्मी नारायणाच्या मूर्ती तेजाची साक्ष देताहेत.

मंदिरास नावीन्याचा साज
मंदिर बांधणीला मोठा काळ लोटल्याने मंदिराची पडझड झाल्याने त्याला नावीन्याचा साज चढवून पूर्वीचे वैभव प्राप्त करून दिले आहे. अतिशय जागृत हे देवस्थान असल्याचे सामाजिक कार्यकर्ते व शिवसेना उद्धव बाळासाहेब ठाकरे पक्षाचे उपतालुकाप्रमुख संजय घनवट यांनी सांगितले. तर श्रावण महिन्याच्या प्रत्येक सोमवारी येथील शिवलिंगावर अभिषेक व रुद्राभिषेक करण्यात येत असल्याचे पुजारी सूर्यकांत चासकर तसेच सुरेश चासकर यांनी सांगितले.
03703, 03704