गोऱ्हे भटक्या कुत्र्यांसह वन्यप्राण्यांची शिकार

चास, ता.१२ : गाय दूध देते म्हणून तिचे संगोपन करायचे. मात्र, तीच भाकड झाल्यावर कसायाला दिली जाते. अशीच स्थिती जर्शी गोऱ्ह्यांच्या निर्माण झाली आहे. जर्शी गोऱ्हे जन्माला येताच काही दिवसांत ते कसायाला विनामोबदला दिले जात आहेत. पण आता गोरक्षकांच्या भितीमुळे हेच गोऱ्हे कसायाला न देता जंगलात बेवासरपणे मरण्यासाठी सोडून देत असल्याचे विदारक चित्र खेडसह इतर तालुक्यांमध्ये दिसत आहे.
पशुपालक गायीला कालवड झाली तर तिचे संगोपन आनंदाने करतात. गोऱ्हा कसायाला दिला जातो किंवा जंगलात सोडला जातो. यामुळे तो भटक्या कुत्र्यांसह वन्य प्राण्यांचा शिकार होतो. काही दिवसांपूर्वी कान्हेवाडी बुद्रुक येथील डोंगराळ भागात दोन जर्शी गोऱ्हे बेवारसणे सोडलेले दिसून आले तर शनिवारी (ता. ९) मिरजेवाडी (ता. खेड) येथील वनविभागाच्या हद्दीत बेवारसपणे तीन जर्शी गोऱ्हे सोडलेले दिसून आले.

मुंबई उच्च न्यायालय व महाराष्ट्र शासन प्राणी कल्याण अधिकारी ॲड. नीलेश आंधळे यांच्याशी याबाबत संपर्क केला असता त्यांनी सांगितले की, लहान वासरे सोडून देणे हा प्राणी क्रूरता प्रतिबंधक कायदा १९६० अंतर्गत दंडनीय अपराध असल्याची शेतकऱ्याला माहिती नसल्याने याबाबत जनजागृती करणे गरजेचे आहे. ग्रामपंचायत पशुवैद्यकीय अधिकारी व पोलिस प्रशासनाने याबाबत संयुक्तरीत्या कारवाई तसेच अटकाव करणे गरजेचे आहे. जर्सी गोऱ्हे जन्माला आल्यानंतर लगेच जंगलात सोडले जात आहेत. यामुळे नरवासरे व दूध न देणाऱ्या जनावरांच्या संगोपनासाठी शासकीय व स्वयंसेवी संस्थांमार्फत आर्थिक मदत व आश्रय सुविधा उपलब्ध करून देणे गरजेचे आहे.

शासनाने पशुपालकांना कमी दरात उपलब्ध सिमन्स उपलब्ध करून देणे गरजेचे. भविष्यात शेतकऱ्यांनी देखील त्याचा वापर करणे गरजेचे आहे. सिमन्सद्वारे ९९ टक्के मादी वासरू जन्माला येईल, अशी तजवीज करण्यात आलेली आहे. लगेच जन्माला आलेले वासरू गोशाळेत सोडले तरी ते जगण्याचे प्रमाण अत्यल्प असते.
- ॲड. नीलेश आंधळे, प्राणी कल्याण अधिकारी, मुंबई उच्च न्यायालय
03712