डेहणे महाविद्यालयात युवतींना मार्गदर्शन

चास, ता. ९ : ‘‘स्व संरक्षणासाठी युवतींनी कराटेचे प्रशिक्षण घेणे गरजेचे असून यामुळे आपला बचाव करणे शक्य होते,’’ असे मत कराटे प्रशिक्षक रमेशकुमार सोनवणे यांनी डेहणे (ता. खेड) येथील हुतात्मा राजगुरू शिक्षण प्रसारक मंडळाचे कला, वाणिज्य आणि विज्ञान महाविद्यालयात निर्भय कन्या अभियान अंतर्गत युवतींना मार्गदर्शन करताना व्यक्त केले.
सावित्रीबाई फुले पुणे विद्यापीठ, हुतात्मा राजगुरू शिक्षण प्रसारक मंडळाचे कला, वाणिज्य आणि विज्ञान महाविद्यालय डेहणे व विद्यार्थी विकास मंडळाच्या वतीने डेहणे येथील महाविद्यालयात एकदिवसीय निर्भय कन्या अभियान राबविण्यात आले. या कार्यक्रमाच्या अध्यक्षस्थानी प्राचार्य डॉ. किशोर भागवत होते तर प्रमुख वक्ते म्हणून अ‍ॅड. संजय गोपाळे होते. त्यांच्या हस्ते प्रतिमा पूजन करण्यात आले. कार्यक्रम प्रसंगी प्रमुख वक्ते म्हणून अ‍ॅड. संजय गोपाळे यांनी मार्गदर्शन करताना महिलांचे कायदेविषयक अधिकार या बाबत माहिती दिली.
डॉ. दीपिका उगले यांनी मुलींचे आरोग्य आणि आजार याविषयी मार्गदर्शन केले. रमेशकुमार सोनवणे यांनी स्व संरक्षणाचे कराटे प्रशिक्षण देत प्रात्याक्षिकही करून दाखवले. अध्यक्षीय मार्गदर्शनात प्राचार्य डॉ. किशोर भागवत यांनी विद्यार्थिनींनी सक्षम आणि सबल व्हावे असे मत व्यक्त केले. या प्रसंगी महाविद्यालयाचे उपप्राचार्य प्रा. सिलदार पावरा, कनिष्ठ विभाग प्रमुख प्रा. महेश रानवडे, अ‍ॅड. रोहिणी पाटोळे सर्व विभाग प्रमुख व सहकारी प्राध्यापक तसेच विद्यार्थी उपस्थित होते. प्रास्ताविक प्राध्यापिका अनिता मुळूक यांनी केले.