भोमाळेतील आदिवासी भगिनींना भाऊबीजेची ओवाळणी

चास, ता. २७ ः खेड तालुक्याच्या पश्चिम पट्ट्यातील भोमाळे गावातील आदिवासी व कातकरी समाजाच्या भगिनींसोबत अस्तित्व कला मंचच्या वतीने यंदाची भाऊबीज साजरी करण्यात आली. अस्तित्व कला मंचतर्फे दिवाळीनिमित्त साखर व साडी वाटप करून या भगिनींची दिवाळी गोड केली गेली. शहरातून आलेले भाऊ त्यांच्या भेटीस आले हा त्यांच्या दृष्टीने अनमोल क्षण ठरला.
कार्यक्रमादरम्यान अनेक महिलांच्या डोळ्यांत आनंदाश्रू तरळले. या उपक्रमासाठी अस्तित्व कला मंचचे संस्थापक योगेश गोंधळे, विश्वस्त दीपक कुदळे, सदस्य सुदीप कुदळे यांच्यासोबत भीमाशंकर देवस्थान ट्रस्टचे अध्यक्ष सुरेश कौदरे, समीर सुपे, चंद्रकांत कौदरे, भोलानाथ कौदरे, गौरव क्षीरसागर, अंकुश शिंदे, मनोहर शिंदे, शशिकांत शेलार, डॉ. आदित्य जगदाळे तसेच स्थानिक उपस्थित होते. कार्यक्रमाचे सूत्रसंचालन मच्छिंद्र जगदाळे यांनी केले. जिल्हा बँकेचे विकास अधिकारी समीर सुपे यांनी आभार मानले.