कळमजाई दूध संस्थेतर्फे १०० टक्के अनुदान

खोडद, ता.२४ : दूध उत्पादकांना ७ रुपये प्रति लिटरप्रमाणे १०० टक्के अनुदान देण्यात हिवरेतर्फे नारायणगाव येथील कळमजाई दूध उत्पादक संस्था अग्रेसर ठरली आहे. सर्व गवळ्यांना एकूण १० लाख ५० हजार रुपये अनुदान संस्थेकडून देण्यात आल्याची माहिती संस्थेचे अध्यक्ष चिमणराव वायाळ यांनी दिली.

महाराष्ट्र शासन दुग्ध विकास विभागाने दुधाचे बाजारभाव कमी झाल्यामुळे दूध उत्पादकांना ११ जानेवारी २०२४ ते १० मार्च २००२४ पर्यंत आणि जुलै २०२४ ते सप्टेंबर २०२४ पर्यंत पाच रुपये प्रतिलिटर प्रमाणे आणि ऑक्टोबर २०२४ ते नोव्हेंबर २०२४ या कालावधीसाठी सात रुपये प्रतिलिटरप्रमाणे अनुदान देण्याचे कबूल केले होते. यामध्ये अनेक दूध संस्थांनी सहभाग नोंदविला होता. प्रतिलिटर पाच रुपयांप्रमाणे अनुदान जिल्ह्यात सर्वप्रथम कळमजाई दूध संस्थेला प्राप्त झाले होते. तसेच राहिलेले सर्व अनुदान शंभर टक्के दूध उत्पादकांना देण्यामध्ये कळमजाई दूध संस्था अग्रेसर राहिलेली आहे. सदरची योजना राबवत असताना पुणे जिल्हा सहकारी दूध उत्पादक संघाचे अध्यक्ष ॲड. स्वप्नील ढमढेरे, संचालक बाळासाहेब खिलारी व भाऊसाहेब देवाडे यांचे मोलाचे सहकार्य लाभले आहे. अनुदानाचा लाभ मिळालेला असल्याने दूध उत्पादकांमध्ये आनंदाचे वातावरण असल्याची माहिती संस्थेचे उपाध्यक्ष रोहिदास भोर यांनी दिली.

दरम्यान, दिलेले आश्वासन पूर्ण करत प्रतिलिटर तीन रुपये प्रमाणे होणारी २० लाख रुपये सर्व दूध उत्पादकांच्या बँक खात्यात वर्ग केल्याची माहिती कळमजाई दूध संस्थेचे सचिव मनीष मोरडे यांनी दिली.

दूध उत्पादकांना शासनाचे अनुदान मिळवून देण्यासाठी खोडदचे पशुधन विकास अधिकारी डॉ. लामखडे व डॉ. लोंढे, जिल्हा वरिष्ठ अधिकारी डॉ. मणियार यांची मोलाची मदत मिळाल्याचे अध्यक्ष चिमणराव वायाळ यांनी सांगितले.