अज्ञात वाहनाच्या धडकेत बिबट्याच्या बछड्याचा मृत्यू

खोडद, ता.२८ : हिवरेतर्फे नारायणगाव (ता.जुन्नर) येथे अज्ञात वाहनाच्या धडकेत बिबट्याच्या बछड्याचा मृत्यू झाला. ही घटना शुक्रवारी (ता. २७) रात्री दहाच्या सुमारास घडली.
वनविभागाने दिलेल्या माहितीनुसार, शिवहरीनगर येथे नारायणगाव खोडद रस्त्यावर शुक्रवारी रात्री दहाच्या सुमारास येथील अज्ञात वाहनाच्या धडकेने बिबट्याच्या दोन महिने वयाच्या बछड्याचा मृत्यू झाला. हा बछडा मादी जातीचा आहे. खोडद ग्रामपंचायतचे सदस्य योगेश शिंदे हे नारायणगावहून खोडदला जात असताना ही घटना त्यांच्या लक्षात आली. यानंतर शिंदे यांनी तात्काळ वनविभागाला संपर्क साधून, याबाबत माहिती दिली. वनविभागाचे वनरक्षक विशाल गुंड यांच्या मार्गदर्शनाखाली रेस्क्यू टीमचे सोमनाथ भालेराव, रवी काळे, रोशन भोर यांनी मृत बछड्याची पुढील प्रक्रिया पार पाडली.