पंतप्रधानांकडून खोडदच्या सुपुत्राचा गौरव

खोडद, ता. ३० : पंतप्रधान नरेंद्र मोदी यांनी खोडद (ता. जुन्नर) गावचे सुपुत्र व वनविभागात वनरक्षक म्हणून कार्यरत असलेले रमेश खरमाळे यांच्या कार्याची दखल घेत मन की बात या कार्यक्रमात खरमाळे यांच्याविषयी चर्चा केली. थेट देशाच्या पंतप्रधानांनीच दखल घेतल्याने खरमाळे यांचे सर्वत्र कौतुक होत आहे.
एकीकडे विकासाच्या नावाखाली रोज निसर्ग ओरबाडला जात असताना वनरक्षक असलेले खरमाळे यांनी मागील अनेक वर्षे निसर्गाची सेवा केली आहे. पंतप्रधान मोदींनी खरमाळे यांची घेतलेली दखल हा खोडदकरांसाठी हा गौरवाचा क्षण होता.
खरमाळे यांनी आपले शिक्षण येथील महात्मा फुले विद्यालयातून पूर्ण केल्यानंतर देशसेवेसाठी भारतीय सेनेत भरती होण्याचा निश्चय केला. त्याप्रमाणे तयारी करून ते सेनेत भरती देखील झाले आणि आपली सेवा अतिशय प्रामाणिकपणे पूर्ण केली. निवृत्तीनंतर त्यांना समाजासाठी काहीतरी चांगले काम करण्याची इच्छा होती. सेनेतून निवृत्त झाल्यानंतर ते वनखात्यात रुजू झाले आणि त्यातून त्यांची सह्याद्रीतील वनांसोबत नाळ जोडली गेली. निसर्गाचा होणारा ऱ्हास त्यांना अस्वस्थ करत होता म्हणून ते वृक्षसंवर्धन आणि वृक्षलागवड करू लागले. नागरिकांमध्ये आणि शाळांमध्ये विविध व्याख्यानाच्या माध्यमातून त्यांनी जनजागृती करून सर्वसामान्य लोकांना या कार्यात सहभागी करून घेतले. त्यांच्या या कार्यामध्ये पत्नी स्वाती, मुलगा मयुरेश आणि मुलगी वैष्णवी यांचाही सहभाग उल्लेखनीय आहे.
खरमाळे यांच्या कामाला पाहता पाहता वेग आला. जंगलातील पशू- पक्षांसाठी त्यांनी निसर्ग तळी तयार केली. वनजमिनीत पाणी जिरावे म्हणून त्यांनी ६० दिवसांत ७० जलसोषक चर खोदले, याचा परिणाम म्हणून वनजमिनीतील भूजल पातळीत वाढ होण्यास मदत झाली. याच कामाची दखल देशाचे पंतप्रधान नरेंद्र मोदी यांनी घेतली. खरमाळे यांचे हे पर्यावरण संवर्धनाचे व्रत अव्याहत सुरू आहे. त्यांना आजवर शिवनेर भूषण, इंडिया बुक ऑफ रेकॉर्ड आणि इतर मनाचे पुरस्कार देखील प्राप्त झाले आहेत.

जागतिक तापमानात दिवसेंदिवस वाढ होत आहे. ही बाब सर्वांनीच गांभीर्याने घ्यायला हवी. पर्यावरणामुळे सर्वांनाच फायदे आहेत. पर्यावरण जपण्यासाठी व समृद्धीसाठी आतापर्यंत प्रामाणिकपणे काम केले आहे. ग्रामीण भागातील खोडद सारख्या एका लहानशा गावातील माझ्या सारख्या तरुणाची देशाच्या पंतप्रधानांनी दखल घेतली हा गौरव निःस्वार्थीपणे केलेल्या कामामुळे झाला आहे.
- रमेश खरमाळे, वनरक्षक, जुन्नर वनविभाग