खोडदमधील गडाचीवाडीत जर्सी गायींमध्ये भ्रूण प्रत्यारोपण

खोडद, ता.१८ : वसुबारस दिनाचे औचित्य साधून खोडद (ता.जुन्नर) येथील गडाचीवाडीत गायींचे व वासराचे पूजन करून गायींमध्ये भ्रूण प्रत्यारोपण करण्यात आले, अशी माहिती खोडदचे पशुधन विकास अधिकारी डॉ. शरद लोंढे यांनी दिली.

पुण्यातील ताथवडे भ्रूण प्रत्यारोपण प्रयोगशाळा व खोडद पशुवैद्यकीय दवाखाना यांच्या संयुक्त विद्यमाने पाच गाईंमध्ये गिर व जर्सी गाईचे सात दिवसांचे भ्रूण (गर्भ) सोडण्यात आले. पशुसंवर्धन सहाय्यक आयुक्त डॉ. रतिकांत नवटाके व भ्रूण प्रत्यारोपण प्रयोगशाळेचे पशुवैद्यकीय अधिकारी डॉ. विष्णू जवणे यांनी हे भ्रूण प्रत्यारोपण केले.गडाचीवाडी येथील शेतकरी पशुपालक तुकाराम काळे, नामदेव काळे, संजय काळे, अशोक कुचिक, सिद्धार्थ कुचिक, धनेश चव्हाण व रामदास वामन यांच्या गाईंची तपासणी करून भ्रूण प्रत्यारोपण करण्यात आले.

अनुवंशिक सुधारणा करण्यासाठी कृत्रिम रेतनाद्वारे सुमारे सात पिढ्या लागतात तेव्हा सुधारणा होते परंतु भ्रूण प्रत्यारोपणाद्वारे एका पिढीमध्ये आनुवंशिक सुधारणा होऊन जास्त दूध उत्पादन मिळते.महाराष्ट्र शासनाच्या महाराष्ट्र पशुधन विकास मंडळ, नागपूर मार्फत शेतकऱ्यांच्या दारावर भ्रूण प्रत्यारोपण करणे ही योजना राबवली जाते, सदर योजनेअंतर्गत पशुपालकास वासरू ठेवायचे असल्यास खात्रीशीर गर्भधारणेसाठी २१ हजार रुपये शुल्क शासनास भरावे लागते व पशुपालकास वासरू लागत नसल्यास शासन एक महिन्याचे वासरू मालकास १० हजार रुपये देऊन विकत घेते व तसा याबाबत करार करण्यात येतो. नियमित माजावर येणाऱ्या गाई, कालवडी यांची निवड या योजनेत करण्यात येते, अशी माहिती खोडद येथील पशुधन विकास अधिकारी डॉ. लोंढे यांनी दिली. या योजनेमध्ये भाग घेण्यासाठी पशुपालकांनी स्थानिक पशुवैद्यकीय संस्थेमार्फत भ्रूण प्रत्यारोपण प्रयोगशाळा ताथवडे या ठिकाणी संपर्क करावा, असे आवाहन डॉ.विष्णू जवणे यांनी केले.

01686