पारगाव तर्फे आळे येथे लावले १५ पिंजरे, १० ट्रॅप कॅमेरे

खोडद, ता.१५ : पारगाव तर्फे आळे (ता. जुन्नर) येथील रामवाडी येथे ८ वर्षीय मुलावर बिबट्याने हल्ला करून त्याला ठार केल्याची घटना सोमवारी (ता. १५) सकाळी साडेअकराच्या सुमारास घडली. या घटनेच्या पार्श्वभूमीवर नरभक्षक बिबट्याला पकडण्यासाठी वनविभागाने १५ पिंजरे आणि १० ट्रॅप कॅमेरे लावण्याची माहिती जुन्नरचे उपवनसंरक्षक प्रशांत खाडे यांनी दिली.
या हल्ल्यात रोहित कापरे या मुलाचा मृत्यू झाला. यानंतर ग्रामस्थांनी नरभक्षक बिबट्याला ठार करण्याची मागणी करत सरकारने बिबट्यांचा बंदोबस्त करावा, अशी आग्रही मागणी केली. यानंतर जुन्नर व विभागाच्या वतीने या परिसरातील नरभक्षक बिबट्याला पकडण्यासाठी घटनास्थळी आणि परिसरात १५ पिंजरे लावण्यात आले असून त्याचबरोबर दहा ट्रॅप कॅमेरे लावण्यात आले आहेत. जुन्नरचे उपवनसंरक्षक प्रशांत खाडे, ओतूरचे वनपरिक्षेत्राधिकारी चैतन्य कांबळे, जुन्नरचे वनपरिक्षेत्र अधिकारी प्रदीप चव्हाण यांच्या मार्गदर्शनाखाली ओतूर आणि जुन्नरचे वनपाल, वनरक्षक तसेच वनकर्मचारी यांनी घटनास्थळी सोमवारी सायंकाळी १५ पिंजरे आणि ट्रॅप कॅमेरे लावले. सोमवारी सायंकाळी उशिरा पर्यंत पिंजरे आणि ट्रॅप कॅमेरे लावण्याचे काम सुरू होते. वनरक्षक स्वप्नील केदारी, विशाल गुंड, महेश जगधने आदींनी हे पिंजरे आणि कॅमेरे लावण्याचे काम केले.