दौंडमध्ये दोन ट्रॉली निर्माल्य संकलन

दौंड, ता. ७ : शहरातील भीमा नदीतीरावर दौंड नगरपालिका आणि रोटरी व रोटरॅक्ट क्लबकडून दोन ट्रॉली निर्माल्य संकलन करण्यात आले.
दौंड शहर व परिसरात गणेशोत्सव व गौरी- गणपती काळात दूर्वा, जास्वंद आणि झेंडूची फुले, फुलांचे हार, पाने व अन्य वनस्पतींचे घरोघरी निर्माल्य जमा झाले होते. भाविक गणेशमूर्ती विसर्जनासाठी भीमा नदीतीरावर आल्यावर हे निर्माल्य थेट नदी पात्रात टाकत असल्याने त्यांना नदीपात्रात न टाकता निर्माल्य जमा करण्याचे आवाहन करण्यात आले. नगरपालिकेच्या वतीने ध्वनिवर्धकावरून करण्यात आलेल्या आवाहनाला सकारात्मक प्रतिसाद देत नागरिकांनी स्वयंसेवकांकडे निर्माल्य जमा केले.
नदीतीरावर नगरपालिकेचे आरोग्य विभागातील कर्मचारी, रोटरी क्लब आणि रोटरॅक्ट क्लब ऑफ दौंड कॅालेजच्या स्वयंसेवकांनी भाविकांना आवाहन करीत दोन ट्रॉली निर्माल्याचे संकलन केले. यावेळी नगरपालिकेचे मुख्याधिकारी अवधूत तावडे, आरोग्य अधिकारी स्नेहा खुडे, आरोग्य विभागाचे शाहू पाटील, रवींद्र यशवंत जाधव, प्रवीण खुडे, विशाल ओहोळ, ओंकार मेनसे, रोटरी क्लब ऑफ दौंडचे अध्यक्ष दीपक शासम, सचिव प्रज्ञा राजोपाध्ये, संचालक राकेश अग्रवाल, चांगदेव शेलार, रोटरॅक्ट क्लब ऑफ दौंडचे अध्यक्ष अनुराग सरोदे, सचिव ऋषिकेश हंचाटे आदी उपस्थित होते.
जमा झालेल्या निर्माल्यातून कंपोस्ट खत तयार करून त्या खताचा वापर शोभिवंत झाडांच्या कुंड्या, फुलझाडे आणि परसबागेतील रोपांसाठी केला जाणार आहे, अशी माहिती रोटरी क्लबचे संचालक राकेश अग्रवाल यांनी दिली.

04057