दौंडमधील कन्या विद्यालयात जुन्या आठवणींना उजाळा

दौंड, ता. १५ : दौंड शहरातील श्रीमती विठाबाई चव्हाण कन्या विद्यालयाच्या माजी विद्यार्थिनींचा स्नेहमेळावा उत्साहात पार पडला. स्नेहमेळाव्यात मैत्रिणींना भेटून त्यांच्या चेहऱ्यावर हास्य फुलल्याचे आणि आठवणींमध्ये रमल्याचे दिसून आले.
विद्यालयाच्या माजी विद्यार्थिनी संघाने स्नेहमेळाव्याचे संयोजन केले होते. प्राचार्य माधुरी काकडे, माजी प्राचार्य समिना काझी, सत्यदेव खाडे यांच्यासह शिक्षक वृंद स्नेहमेळाव्यास उपस्थित होते. स्नेहमेळाव्याच्या निमित्ताने माजी विद्यार्थिनींनी अनेक गोष्टींवर एकमेकांशी चर्चा करीत शाळेनंतर झालेल्या वाटचालीची परस्परांना माहिती दिली. विद्यार्थिनी व शिक्षक वृंद परस्परांना भेटल्याने त्यांच्या चेहऱ्यावर आनंद ओसंडून वाहत होता. उपस्थित शिक्षक वृंदाने यावेळी मार्गदर्शन करण्यासह विद्यार्थिनींचे कौतुक करीत आठवणींना उजाळा दिला. तर विद्यार्थिनींनी शिक्षकांविषयी कृतज्ञता व्यक्त केली.
बहुतांश विद्यार्थिनींनी आपल्या वर्गात जाऊन आवडत्या बाकावर बसून जुन्या आठवणींना उजाळा दिला. यावेळी विविध स्पर्धा घेण्यात आल्या. ज्योती नाईक व प्रियांका मत्रे यांनी सूत्रसंचालन केले. विद्यालयाच्या राष्ट्रीय स्तरावरील पूर्व कबड्डीपटू व सेवानिवृत्त सहायक उपनिरीक्षक श्रध्दा पठारे यांच्यासह माजी विद्यार्थिनी पूजा खाडे, नेहा इंगळे, मंजिरी बिडवे व श्रुती शिंदे यांनी आठवणींना उजाळा देत मनोगत व्यक्त केले. प्राचार्य माधुरी काकडे यांनी शाळा व माजी विद्यार्थिनी यांच्यामधील ऋणानुबंध एका स्वरचित कवितेद्वारे सादर केले. ज्योती धर्माधिकारी यांनी आभार केले.

दौंड : स्नेहमेळाव्यास उपस्थित श्रीमती विठाबाई चव्हाण कन्या विद्यालयाच्या माजी विद्यार्थिनी व शिक्षक वृंद.