कत्तलीसाठी आणलेल्या चार गायींची सुटका

दौंड, ता. २२ : दौंड शहरात कत्तलीसाठी आणलेल्या चार गायींची सुटका झाली आहे. या प्रकरणी दोघांविरोधात गुन्हा दाखल करण्यात आला आहे.
दौंड शहरातील भीमा नदीकाठावरील ईदगाह मैदानाजवळ शुक्रवारी (ता. २१) चार गायी कत्तलीसाठी बांधून ठेवल्या होत्या. दौंड पोलिसांना या बाबत माहिती मिळाल्यानंतर पोलिस पथक घटनास्थळी दाखल झाले. पोलिसांनी तेथील झुडपांमध्ये बांधून ठेवलेल्या चार जर्सी गायींची सुटका केली. दौंड पोलिस ठाण्यात पोलिस अंमलदार नजीर तांबोळी यांनी या प्रकरणी फिर्याद दाखल केली आहे. फिर्यादीनुसार आसिफ कासम कुरेशी, शाहरुख शरीफ कुरेशी (दोघे रा. खाटीक गल्ली, दौंड) यांच्याविरोधात महाराष्ट्र प्राणी संरक्षण अधिनियम आणि प्राण्यांचा छळ प्रतिबंधक अधिनियमातील कलमान्वये गुन्हा दाखल करण्यात आला आहे. या गायींची एका गोशाळेत रवानगी करण्यात आली आहे.