रेल्वेत दागिने चोरणाऱ्यास अटक

दौंड, ता. १७ : बेंगळुरू- मुंबई उद्यान एक्सप्रेसमधील एका नवविवाहित दांपत्याचे एकूण १० लाख रुपयांचे दागिने व चीजवस्तू चोरणाऱ्या चोरास मोहोळ (जि. सोलापूर) येथे अटक करण्यात आली आहे. पुणे लोहमार्ग पोलिसांनी चोरीस गेलेल्या ऐवजापैकी ९ लाख ६८ हजार रुपयांचा ऐवज हस्तगत केला.
याबाबत लोहमार्ग पोलिसांनी माहिती दिली की, ४ डिसेंबर रोजी लग्न झालेले भाविक ललीतकुमार जैन (वय २६, रा. भायखळा, मुंबई) हे सोमवारी (ता. १५) आपल्या पत्नीसह बेंगळुरू ते मुंबई, असा उद्यान एक्सप्रेसने प्रवास करीत होते. उद्यान एक्सप्रेसने मंगळवारी (ता. १६) सोलापूर रेल्वे स्थानक सोडल्यानंतर त्यांना त्यांची वरच्या बर्थवर ठेवलेली लॅपटॅाप असलेली सॅकबॅग चोरीला गेल्याचे लक्षात आले. बॅगमध्ये सात तोळे वजनाचे सोन्याचे ब्रेसलेट, दोन आयफोन मोबाइल, एक अॅपल कंपनीचा लॅपटॅाप व रोख ३३ हजार रुपये, असा एकूण १० लाख १९ हजार रुपयांचा ऐवज होता.
दरम्यान भाविक जैन यांनी दौंड रेल्वे स्थानक येथे उतरून दौंड लोहमार्ग पोलिसांना या चोरीविषयी माहिती दिली. दौंड लोहमार्ग पोलिस व पुणे लोहमार्ग पोलिस दलाच्या स्थानिक गुन्हे अन्वेषण शाखेने तातडीने तपास सुरू केला. तांत्रिक विश्लेषणाच्या आधारे लॅपटॅाप सॅकबॅग चोरणारा हा पुणे- सोलापूर राष्ट्रीय महामार्गाने सोलापूरच्या दिशेने प्रवास करीत असल्याची माहिती पोलिसांना मिळाली. पोलिसांनी प्राप्त माहितीच्या आधारे पाठलाग करीत मोहोळ येथे मंचर- अक्कलकोट एसटी बस संशयावरून थांबवून तपासणी केली. एसटीमध्ये एक तरुण संशयास्पद हालचाली करताना आढळला. त्याला ताब्यात घेऊन झडती घेतली असता त्याच्याकडे दोन आयफोन मोबाइल, सोन्याचे ब्रेसलेट व रोख ३३ हजार रुपये आढळून आले. त्या संशयित चोरट्याचे नाव चन्नावीर बसवराज रामशेट्टी (वय २७ , रा. आळंद सूर, जि. कलबुर्गी, कर्नाटक) असल्याचे निष्पन्न झाले. चोरीस गेलेल्या अॅपल कंपनीच्या लॅपटॅापचा मात्र शोध लागलेला नाही.
पुणे लोहमार्ग पोलिस दलाच्या अधीक्षक अश्विनी सानप यांच्या मार्गदर्शनाखाली निरीक्षक राजेंद्र गायकवाड, सहायक निरीक्षक बाळासाहेब अंतरकर, सहायक उप निरीक्षक धनंजय वीर, हवालदार आनंद वाघमारे, कोंगे अंमलदार नरेंद्र पवार, आकाश चव्हाण, सजित जगताप, संदीप उसरे, चालक संदीप काकडे, आदींनी या तपासात भाग घेतला.