दादांचे आश्वासक शब्द जीवनाला उभारी देणारे

दादांचे आश्वासक शब्द जीवनाला उभारी देणारे

- दुर्गादेवी जगदाळे, नगराध्यक्षा, दौंड

उपमुख्यमंत्री अजित पवार यांनी दिलेल्या मान्यतेनुसार सर्वानुमते माझी दौंड नगरपालिकेच्या नगराध्यक्षपदासाठी उमेदवारी निश्चित झाली. माझ्या जीवनातील पहिल्याच निवडणुकीसाठी अजितदादा पवार यांनी स्वतः प्रचारसभा घेतली. माझ्यासाठी आणि पक्षाच्या सर्व उमेदवारांसाठी मतदानाचे आवाहन केले. त्यांच्या आवाहनाला दौंडकरांनी प्रतिसाद देत मला प्रचंड बहुमताने निवडून दिले. निवडून आल्यानंतर अजितदादा यांची प्रत्यक्षात भेट होऊ शकली नाही. परंतु फोनवरून त्यांनी मला माझ्या भावी राजकीय वाटचालीसाठी शुभेच्छा दिल्या. अभिनंदन करताना त्यांनी, ‘तुम्ही चांगलं काम करा. दौंड शहराच्या विकासासाठी चांगला व सक्षम आराखडा सहकाऱ्यांच्या साथीने तयार करा. तुम्हाला मी निधीसाठी कुठेही कमी पडणार नाही,’ अशी ग्वाही दिली होती. त्यांचे हे आश्वासक शब्द जीवनाला उभारी देणारे आहेत. त्यांच्या जाण्याने जो आघात झाला आहे, तो शब्दांच्या पलीकडे आहे. महाराष्ट्र राज्यासह सर्व कार्यकर्त्यांचे कधीही न भरून येणारे नुकसान झालेले आहे.