अळ्यायुक्त जेवणप्रकरणी दोन अधीक्षक निलंबित

अळ्यायुक्त जेवणप्रकरणी दोन अधीक्षक निलंबित

घोडेगाव, ता. ११ : आदिवासी विद्यार्थ्यांना अन्नातून अळ्यायुक्त जेवण पुरविल्याप्रकरणी मध्यवर्ती स्वयंपाक गृहावर नेमणूक असलेले प्रवीण नारायण शिंदे व दिनेश अरविंद पाटील या दोन शासकीय अधीक्षकांवर निलंबनाची कारवाई करण्यात आली असल्याचे चौकशी समितीचे प्रमुख अभय गोवेकर व प्रकल्प अधिकारी संदीप पाटील यांनी सांगितले.
कोटमदरा (ता. आंबेगाव) येथून आंबेगाव, खेड, जुन्नर तालुक्यातील सोळा आश्रमशाळांमध्ये चार हजारांपेक्षा अधिक आदिवासी विद्यार्थ्यांना स्त्री शक्ती या संस्थेकडून अन्नपुरवठा केला जातो. गोहे येथील आश्रम शाळेत सात जुलै रोजी दिलेल्या जेवणातील सोयाबीनच्या भाजीत अळ्या सापपडल्याने बिरसा ब्रिगेड, स्टुडंट्स फेडरेशन ऑफ इंडिया, आम आदमी पार्टी, शाश्वत संस्था, कृषी उत्पन्न बाजार समिती खेड आदी संघटनांसह जुन्नर, आंबेगाव, खेड तालुक्यातील अनेक कार्यकर्त्यांनी मध्यवर्ती स्वयंपाकगृहावर देखरेखीसाठी नेमण्यात आलेल्या दोन अधीक्षकांवर निलंबनाची कारवाई करावी व संबंधित संस्थेचा अन्नपुरवठा ठेका रद्द करावा. या मागणीसाठी मागील तीन दिवसांपासून घोडेगाव येथील आदिवासी प्रकल्प कार्यालयावर आंदोलन सुरू केले होते. अखेर संघटनांच्या आंदोलनासमोर प्रशासनाला नमते घेत मध्यवर्ती स्वयंपाक गृहावर नेमणुकीस असणाऱ्या दोन शासकीय अधीक्षकांवर निलंबनाची कारवाई करावी लागली. यावेळी कृषी उत्पन्न बाजार समितीचे संचालक देवदत्त निकम यांनी आंदोलन स्थळी तीन दिवस उपस्थित राहून आंदोलनास पाठिंबा दिला.
दरम्यान, आंदोलन केल्याने लढ्याला यश आले असल्याचे बिरसा ब्रिगेडचे जिल्हाध्यक्ष प्रवीण पारधी यांनी सांगितले.

ब्रेक घ्या, डोकं चालवा, कोडे सोडवा!

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Marathi News Esakal
www.esakal.com