गंगापूरच्या लोहोट परिवाराचा पर्यावरणासाठी अनोखा उपक्रम

घोडेगाव, ता. १३ : गंगापूर बुद्रुक (ता. आंबेगाव) येथील लोहोट परिवाराने सरूबाई विठ्ठलराव लोहोट (वय ८७) यांच्या अंत्यविधीनंतरची राख पाण्यात न सोडता आपल्या शेतात व झाडांना पसरवली. त्यामुळे नदीतील जलप्रदूषण कमी होण्यास मदत होणार आहे. या अनोख्या उपक्रमाचे ग्रामस्थांनी कौतुक केले. त्याचे अनुकरण गावातील सर्वांनी करावे, असे आवाहन या परिवाराने केले आहे.
कोणत्याही व्यक्तीच्या मृत्यूनंतर दुसऱ्या दिवशी ती राख पाण्यात सोडून देण्याची परंपरा आहे. मात्र, तिला फाटा देण्याचा प्रयत्न लोहोट कुटुंबाने केला आहे. विठ्ठलराव अर्जुनराव लोहोट यांच्या पत्नी सरूबाई यांचे ५ सप्टेंबर रोजी निधन झाले. अंत्यसंस्कारानंतर दुसऱ्या दिवशी सावडण्याचा कार्यक्रम झाला. त्यावेळी परंपरेनुसार फक्त थोडीशी राख घोड नदीच्या पाण्यात सोडण्यात आली. उर्वरित सर्व राख त्यांच्या शेतातील झाडांच्या मुळाशी लावण्यात आली. त्यांचे पुत्र गणपत लोहोट, पुतणे उद्धव लोहोट यांनी या अभिनव उपक्रमासाठी पुढाकार घेतला. यापुढे सर्वांनीच याचे अनुकरण करावे, असा त्यांचा प्रयत्न आहे.
अशा प्रकारचा उपक्रम गावात प्राधान्याने राबवण्याचा विचार आहे. घोड नदीच्या परिसरातील सर्वच गावांनी अशा प्रकारचा उपक्रम राबवला तर नदीचं पाणी दूषित होणार नाही, असे माजी उपसरपंच संदीप येवले म्हणाले.