घोडेगाव पंचायत समितीसाठी येत्या सोमवारी सोडत

घोडेगाव, ता. ८ : घोडेगाव (ता आंबेगाव) येथील पंचायत समिती सभागृहात पंचायत समिती सार्वत्रिक निवडणूक २०२५ करिता सार्वत्रिक गणांसाठी सदस्यपदाचे आरक्षण निश्चित करण्यासाठी १३ ऑक्टोबर रोजी सोडत सकाळी ११ वाजता काढण्यात येणार आहे, असे प्रांत अधिकारी गोविंद शिंदे व तहसीलदार संजय नागटिळक यांनी सांगितले.
राज्य निवडणूक आयोगाने जाहीर केलेल्या कार्यक्रमानुसार अनुसूचित जाती व अनुसूचित जमातीकरता जागा निश्चितीचे प्रस्ताव सहा ऑक्टोबरला जिल्हाधिकारी यांच्याकडे सादर करणे, आठ ऑक्टोबरला विभागीय आयुक्तांकडे प्रस्तावास मान्यता देण्यात येणार आहे. १४ ऑक्टोबर रोजी प्रारूप आरक्षणाची अधिसूचना प्रसिध्दी असेल तर १४ ते १७ ऑक्टोबरपर्यंत जिल्हाधिकारी आरक्षणावर हरकती व सूचना सादर करता येणार आहेत. त्याचा अहवाल २७ ऑक्टोबरला विभागीय आयुक्तांकडे पाठवला जाणार आहे. त्यानंतर ३१ पर्यंत सुनावणी होऊन तीन नोव्हेंबरला अंतिम आरक्षण शासन राजपत्रात प्रसिद्ध करण्यात येणार असल्याचे नागटिळक यांनी सांगितले.