घोडेगावात मंगळवारी आदिवासी वैद्यांची बैठक

घोडेगाव, ता. २० : पुणे जिल्ह्यातील आदिवासी बहुल भागात पारंपरिक पद्धतीने उपचार करणाऱ्या आदिवासी वैद्यांची बैठक मंगळवारी (ता. ३०) दुपारी एक वाजता घोडेगाव (ता. आंबेगाव) येथील एकात्मिक आदिवासी विकास प्रकल्प कार्यालय येथे आयोजित केली आहे. या बैठकीतून आदिवासी वैद्यांच्या ज्ञानाचा संकलन व संवर्धन करण्यावर भर देण्यात येणार आहे, अशी माहिती एकात्मिक आदिवासी विकास प्रकल्पाचे प्रकल्प अधिकारी प्रदीप देसाई यांनी दिली.
याबाबत ते म्हणाले की, ‘‘पुणे जिल्ह्यातील आंबेगाव, जुन्नर, खेड, मावळ आदी तालुक्यांतील ग्रामीण व दुर्गम भागात ठाकर, कातकरी व अन्य आदिवासी समाजातील वैद्य पारंपरिक वनौषधींच्या आधारे उपचार करीत आहेत. या वैद्यांनी जतन केलेले दुर्मिळ औषधी वनस्पतींचे ज्ञान महत्त्वाचे असून, अशा वनौषधींची लागवड, संवर्धन व प्रसार यासाठी पुढील जानेवारी महिन्यात ‘आदिवासी वैद्य परिषद’ आयोजित करण्यात येणार आहे. त्या पार्श्वभूमीवर ही पूर्वतयारी बैठक होत आहे.’’
बैठकीत दुर्मिळ वनौषधींची लागवड व संरक्षण, वनौषधींपासून औषधनिर्मितीच्या पारंपरिक पद्धती तसेच आदिवासी वैद्यकीय उपचार पद्धतींना शासकीय व सामाजिक पातळीवर मान्यता मिळवून देण्याबाबत चर्चा होणार आहे. पुणे जिल्ह्यातील आदिवासी ग्रामीण व दुर्गम भागात कार्यरत सर्व आदिवासी वैद्यांनी त्यांच्या उपलब्ध माहिती व अनुभवासह उपस्थित राहावे, असे आवाहन देसाई यांनी केले आहे.