आंबेगावात २३९ मतदान केंद्रे

घोडेगाव, ता. १४ : आंबेगाव तालुक्यात जिल्हा परिषद व पंचायत समिती निवडणुकीसाठी १ हजार ५२ अधिकारी व कर्मचाऱ्यांची नियुक्ती केली आहे. त्यांना निवडणुकीसंदर्भात तीन प्रशिक्षण लवकरच देण्यात येणार आहे, अशी माहिती निवडणूक निर्णय अधिकारी गोविंद शिंदे यांनी दिली.
आंबेगाव तालुक्यात जिल्हा परिषदेच्या पाच व पंचायत समितीच्या दहा जागा आहेत. १४२ महसूल गावांतील २३९ मतदान केंद्रांचा यात समावेश आहे. १ लाख ८४ हजार ५२ मतदार असून उमेदवारांचे नामनिर्देशन पत्रे आंबेगाव तहसील कार्यालय घोडेगाव येथे स्वीकारण्यात येणार आहे. या निवडणुकीसाठी २७५ मतदान यंत्रे आहेत. या मतदान यंत्रांच्या सुरक्षिततेसाठी शासकीय तंत्रनिकेतन महाविद्यालय अवसरी खुर्द येथे स्ट्राँग रूम केले असून, त्याच ठिकाणी मतमोजणी करण्यात येणार आहे. तहसील कार्यालयात प्रत्येक जिल्हा परिषद गटासाठी एक टेबल अर्ज स्वीकारण्यासाठी असणार आहे. या टेबलवर दहा ते पंधरा कर्मचाऱ्यांची नियुक्ती केली आहे.
निवडणूक सुरळीत पार पाडण्याच्या दृष्टीने समन्वयासाठी २३ पथकांची व १६० निवडणूक अधिकारी, कर्मचारी यांची निवडणूक कार्यालयात नियुक्ती केलेली असून, यांच्या माध्यमातून मतदारसंघाच्या विविध कामकाजामध्ये समन्वय ठेवण्यात येणार आहे.