भिवरी परिसरात दहशतीचे वातावरण

गराडे, ता. १७ : भिवरी ( ता. पुरंदर) गावाजवळील विठ्ठलवाडी परिसरात बिबट्याच्या वावरामुळे नागरिकांमध्ये दहशत पसरली आहे. बिबट्यांचा शोध घेण्यासाठी वनरक्षक योगेश नजन, वनसेवक नानासाहेब घाटे ,संतोष गिरे यांचे बचाव पथक दिवसभर व्यस्त होते. त्यांनी शेतातील चिखलामध्ये उमटलेल्या बिबट्याच्या पावलावरून शोध घेण्याचा प्रयत्न केला. भिवरी तंटामुक्त गाव समितीचे माजी अध्यक्ष धोंडीबा कटके म्हणाले की, ‘‘भिवरी पंचक्रोशीतील शेतकरी व नागरिक बिबट्याच्या दहशतीखाली आहेत. वनखात्याने तातडीने या विभागात पिंजरे बसून त्यांचा बंदोबस्त करावा. तसेच दिवसा वीज नसल्यामुळे शेतकऱ्यांना शेतीला रात्री पाणी द्यावे लागते. शेतकरी जीव मुठीत घेऊन सध्या जगत आहे. महावितरणने शेतीसाठी दिवसा वीज द्यावी, अन्यथा येथील शेतकऱ्यांच्या वतीने उग्र आंदोलन करण्यात येईल.’’