इंदापूरच्या वनपरिक्षेत्र अधिकारीपदी भाग्यश्री ठाकूर यांची नियुक्ती

इंदापूर, ता. २८ : इंदापूर तालुक्याच्या वन विभागाच्या वनपरिक्षेत्र अधिकारीपदी भाग्यश्री सुनील ठाकूर यांची नियुक्ती करण्यात आली आहे. भाग्यश्री ठाकूर यांनी यापूर्वी अमरावती सामाजिक वनीकरण विभाग तसेच दहिवडी सामाजिक वनीकरण परिक्षेत्रामध्ये सेवा बजावली असून सातारा जिल्ह्यामध्ये सर्वाधिक वृक्षलागवडीचे काम केले आहे. तसेच महाराष्ट्र ग्रामीण रोजगार हमी योजनेअंतर्गत वैयक्तिक लाभार्थ्यांच्या शेत बांधावर बांबू लागवडीची विशेष कामे केलेली आहेत.
दरम्यान त्यांची सेवा सामाजिक वनीकरण विभागाकडून वनविभागाकडे वर्गीकरण करून इंदापूर वनविभागाच्या वनपरिक्षेत्र अधिकारी पदी नियुक्ती केली आहे. पदभार स्वीकारल्यानंतर दैनिक सकाळ प्रतिनिधी बोलताना भाग्यश्री ठाकूर म्हणाल्या की, इंदापूर तालुक्यातील वनक्षेत्राच्या नैसर्गिक संपत्तीचे संरक्षण, संवर्धन आणि योग्य व्यवस्थापन करण्यास प्राधान्य असेल. जंगलांचा, जैवविविधतेचा आणि पर्यावरणाचा संतुलित विकास साधणे ही केवळ शासकीय जबाबदारी नसून, ती एक सामाजिक बांधिलकी समजून वनसंपत्तीचे जतन, वन्यप्राण्यांचे संरक्षण आणि स्थानिक समुदायाच्या सहकार्याने विकास घडवून आणण्यासाठी प्रयत्नशील राहणार आहे.