शिंगाडेवस्ती, माळवाडीतील यात्रा उत्साहात

इंदापूर, ता. ७ : इंदापूर तालुक्यातील शिंगाडेवस्ती, माळवाडी नं. २ येथे श्रीनाथ म्हस्कोबा व माता जोगेश्वरी यांचा पारंपरिक यात्रा सोहळा मोठ्या भक्तिभावात आणि उत्साहात पार पडला.
यात्रेच्या निमित्ताने मागील आठ दिवसांपासून सुरू असलेला अखंड हरिनाम सप्ताह, शिवलीला अमृत पारायण, कीर्तन, गाथा पठण यांसह शनिवारी (ता. ६) व रविवारी (ता. ७) काढण्यात आलेल्या छबिना व मिरवणुकीने सर्वांचे लक्ष वेधून घेतले. दरम्यान, यात्रेनिमित्त विविध धार्मिक कार्यक्रमांनी परिसर दुमदुमून गेला होता. येथील श्रीनाथ म्हस्कोबा व माता जोगेश्वरी यात्रेच्या निमित्ताने आयोजित अखंड हरिनाम सप्ताहाच्या कार्यक्रमांना सकाळी काकडा आरतीने सुरुवात होत होती. त्यानंतर प्रवचन कीर्तन भजन, पारायण यामधून भक्तांना आध्यात्मिक मार्गदर्शन मिळाले. यावेळी विविध कीर्तनकारांनी आपली सेवा देत सप्ताहाचा उत्साह वाढवला. तर शनिवारी रात्री व रविवार सकाळी यात्रेतील पालखीची मिरवणूक हे यावर्षीचे प्रमुख आकर्षण ठरले. यावेळी माळवाडीसह परिसरातील भाविकांनी दर्शनासाठी मोठी गर्दी केली होती.