शेतकऱ्यांनो, सावधान! चोरांचा डाळिंबावर डोळा

इंदापूर, ता. ९ : खोरोची (ता. इंदापूर) येथील दोन शेतकऱ्यांच्या शेतातून डाळिंबाची चोरी झाली. या प्रकरणी इंदापूर पोलिस ठाण्यात अज्ञात चोरट्यांविरोधात गुन्हा दाखल केला आहे.
याबाबत विठ्ठल तुकाराम चव्हाण (रा. निमगाव केतकी, ता. इंदापूर) यांनी दिलेल्या फिर्यादीनुसार, १७ नोव्हेंबर ते ७ डिसेंबर या कालावधीत खोरोची येथील त्यांच्या शेतातून, तसेच शेजारील मोहन हनुमंत बोराडे यांच्या शेतातून अज्ञात चोरट्यांनी डाळिंबाची चोरी केली. यामध्ये विठ्ठल चव्हाण यांचे २५० क्रेट डाळिंब (अंदाजे किंमत प्रति क्रेट ४०० रुपयांप्रमाणे ६० हजार रुपये), तर मोहन बोराडे यांचे १०० क्रेट डाळिंब (अंदाजे किंमत ४० हजार रुपये), असा एकूण १ लाख रुपयांच्या मालाची चोरी झाल्याचे नमूद केले आहे. त्यावरून अज्ञात चोरट्याच्या विरोधात गुन्हा दाखल केला आहे. या प्रकरणाचा पुढील तपास पोलिस निरीक्षक विलास नाळे यांच्या मार्गदर्शनाखाली पोलिस हवालदार गोसावी करीत आहेत.
निसर्गाच्या लहरीपणामुळे शेतात उभी पिके सुरक्षित ठेवणे शेतकऱ्यांसाठी दिवसेंदिवस कठीण होत असताना डाळिंबाच्या चोरीच्या वाढत्या घटनांमुळे परिसरातील शेतकरी चिंतेत आहेत. पोलिसांनी या प्रकरणी सखोल तपास करून चोरट्यांचा लवकरच शोध लावावा, अशी मागणी शेतकरी वर्गातून होत आहे.