जुन्नरला अध्यापक संघाकडून गुणवंतांचा सन्मान

जुन्नर, ता. १३ : जुन्नर तालुका विज्ञान व गणित अध्यापक संघाच्या वतीने राज्य व राष्ट्रीय पातळीवरील गुणवंत विद्यार्थ्यांचा सन्मान करण्यात आला. यावेळी तालुक्यातील अर्णव लोखंडे (डॉ. होमी भाभा बाल वैज्ञानिक स्पर्धेत सुवर्ण पदक), प्रत्युष माने (राष्ट्रीय पातळीवर विज्ञान प्रदर्शनात सहभाग), सोहम नलावडे (राज्य पातळीवर दिव्यांग गटात प्रथम), स्नेहल दिवटे (नीट परीक्षेत राज्यात प्रथम) यांचा गटशिक्षणाधिकारी अशोक लांडे यांच्या हस्ते सत्कार करण्यात आला.
दहावीच्या परीक्षेत प्रथम तीन क्रमांक मिळविलेले ओजस्वी सराईकर, अनुश्री उचगावकर, समिधा मोरे व आर्या हांडे यांना देखील सन्मानचिन्ह व पुस्तक देऊन गौरविण्यात आले. यावेळी संघाचे अध्यक्ष प्रवीण ताजणे, सचिव प्रकाश जोंधळे, उपाध्यक्ष ज्ञानेश्वर केंद्रे, वीरेंद्र काळे, समन्वयक प्रमोद जाधव, योगेश शेळके, हवामान शास्त्रज्ञ सुधीर फाकटकर, ग्रामीण विज्ञान केंद्राच्या सदस्या सुरेखा फाकटकर तसेच शिक्षक व पालक उपस्थित होते.
जुन्नर तालुका विज्ञान व गणित अध्यापक संघ नवनवीन उपक्रम राबवत असून विविध स्पर्धांमध्ये गुणवंत विद्यार्थ्यांचा केलेला सत्कार त्यांना भविष्यात प्रेरणादायी ठरेल, असे मत गटशिक्षणाधिकारी लांडे यांनी व्यक्त केले. कार्यक्रमाचे सूत्रसंचालन सहसचिव तुषार आहेर यांनी तर आभार खजिनदार व्यंकट मुंडे यांनी मानले.