साडेसाती जाईल सांगून ज्येष्ठाची फसवणूक

जुन्नर, ता. १३ : साडेसाती निघून जाईल, असे सांगून ज्येष्ठ नागरिकाची सोन्याची अंगठी हातचलाखीने काढून घेऊन पोबारा करणाऱ्या दोन चोरट्यांविरुद्ध जुन्नर पोलिस ठाण्यात गुरुवारी (ता. ११) गुन्हा दाखल केला आहे.
याबाबत शांताराम म्हताजी गाढवे (वय ९४, मूळ रा. सावरगाव- बस्ती, गाढवे वस्ती, सध्या रा. बोडके नगर, जुन्नर) यांनी फिर्याद दिली आहे. गाढवे हे बोडकेनगर येथील एका बँकेच्या समोरील कट्टयाजवळ असताना मंगळवारी (ता. ९) सकाळी ही  घटना घडली. गाढवे यांच्या जवळ आलेल्या दोन अनोळखी व्यक्तींनी बोलून त्यांचा विश्वास संपादन केला. त्यांच्या हातातील गणपतीची प्रतिकृती असलेली सोन्याची अंगठी काढून घेतली, ती एका रूमालात बांधली. तो रुमाल घेऊन एकवीस पावले चालली की तुमची साडेसाती निघून जाईल, असे सांगितले. यावेळी हातचलाखीने सोन्याची अंगठी काढून घेऊन फसवणूक केली असल्याचे फिर्यादीत नमूद केले असल्याची माहिती पोलिस निरीक्षक किरण अवचर यांनी दिली.