विद्यार्थ्यांनी बनविले शिवरायांचे सोळा गडकोट

जुन्नर, ता. १७ : प्राचार्य सबनीस प्राथमिक विद्यालयात दिपावली सुट्टीपूर्वी गुरुवारी (ता. १५) गडकोट किल्ले बनवा स्पर्धा आयोजित केली होती. शालेय मातकाम उपक्रमांतर्गत विद्यार्थ्यांनी छत्रपती श्री शिवाजी महाराजांचे जन्मस्थान असलेला किल्ले शिवनेरी आणि स्वराज्याची राजधानी रायगड यांच्यासह विविध सोळा गडकोट बनविले.
शाळेत दिपावली सुट्टीपूर्वी बुधवार (ता. १४) बालआनंद मेळावा घेण्यात आला. याअंतर्गत आठवडे बाजाराचे आयोजन केले होते. या बाजारात विद्यार्थ्यांनी विविध भाज्या, दीपावलीसाठी लागणाऱ्या पणत्या, रंग, रांगोळी, आकाश कंदील तसेच खाद्यपदार्थ विक्रीसाठी ठेवले होते. त्यास पालकांचा उत्स्फूर्त प्रतिसाद मिळाला. आठवडे बाजारात सुमारे तीस हजाराची उलाढाल झाली. मुख्याध्यापिका ऊर्मिला थोरवे सांस्कृतिक विभागप्रमुख अतुल औटी व शिक्षकांनी विद्यार्थ्यांना मार्गदर्शन केले. विद्यार्थ्यांना व्यवहारज्ञान कौशल्य आत्मसात व्हावे तसेच आपला ऐतिहासिक वारसा, गडकोट किल्ल्यांबाबत माहिती व्हावी ह्या हेतूने उपक्रमाचे आयोजन केले होते अशी माहिती थोरवे यांनी दिली.
गटशिक्षणाधिकारी अशोक लांडे, संस्थेचे अध्यक्ष सुधीर ढोबळे, उपाध्यक्ष संजय बुट्टे पाटील, कार्याध्यक्ष राहुल जोशी, कार्यकारी मंडळ सदस्यांनी भेट देऊन मुलांचे कौतुक केले.