‘अपघात टाळण्यासाठी उपाययोजना करा’

जुन्नर, ता. २ : जुन्नर-माणिकडोह रस्त्यावरील कबाडवाडी चौकात सतत होणाऱ्या अपघातांच्या घटना टाळण्यासाठी सार्वजनिक बांधकाम विभागाने उपाययोजना कराव्यात. या मागणीसाठी सोमवारी (ता. ३) चौकात पंचक्रोशीतील नागरिकांनी निषेध आंदोलन आयोजित केले आहे. या वेळी शनिवारी मोटार सायकलच्या धडकेत मृत झालेले माणिकडोह येथील शंकर ढोबळे यांना श्रद्धांजली अर्पण करण्यात येणार आहे. याबाबत युवानेते अजिंक्य घोलप, तसेच कबाडवाडी, खामगाव, माणिकडोह व राजूर येथील आजी माजी सरपंच व उपसपंच स्वाती कबाडी, अरुण पापडे, विक्रम खंडागळे, अविनाश ढोबळे, भिमाजी उतळे, राजू डुंबरे, संतोष ढोबळे, संदीप मुंढे, संकेत कबाडी, आत्माराम कबाडी, मनिष बुट्टे, संदिप पवार यांनी उपविभागीय अभियंता केशव जाधव यांची भेट घेऊन निवेदन दिले.
अपघात टाळण्यासाठी ग्रामस्थांनी चौकात उपाययोजना कराव्यात अशी वारंवार मागणी केली होती. गेल्या काही महिन्यांपासून चौकात अपघात होऊन मृत्यू तसेच जखमी होण्याच्या घटना घडलेल्या आहेत. भविष्यात अशा घटना होऊ नये यासाठी चौकात येणाऱ्या चारही बाजूंच्या रस्त्यांवर गतिरोधक तयार करणे, सूचना फलक लावणे, रस्त्यावरील खड्डे भरून घेणे, साईड पट्ट्या तसेच ओढा- कॅनॉलला संरक्षक भिंत बांधण्यात यावी आदी मागण्या स्थानिक ग्रामस्थांनी केल्या आहेत.