बेलसरमध्ये शेतकऱ्यांना मिळाला हक्का रस्ता

खळद, ता.२३ : बेलसर (ता.पुरंदर) येथे बेलसर ते कोथळे रस्त्याच्या दक्षिण बाजूला असलेल्या रावनाना मळा येथे शेतात जाण्यासाठी गेली पंधरा-वीस वर्ष रस्त्याची अडचण होती. यासंदर्भात वस्तीतील तरुणांच्या पुढाकारातून तहसीलदार विक्रम राजपूत यांच्या मार्गदर्शनाखाली हा वाद मिटला असून येथील नागरिकांना हक्काचा रस्ता मिळाला.
बेलसर रस्त्याचे पंधरा वर्षांपूर्वी काम झाले होते. मात्र, यामध्ये काही शेतकऱ्यांची हरकत आल्याने वादग्रस्त भागातील हा रस्ता अर्धवट अवस्थेत राहिला. अशा परिस्थितीत शेतकऱ्यांना शेतात मेहनतीसाठी अवजारे घेऊन जाणे, पीक घरी घेऊन येणे, यासारख्या अनेक अडचणींचा सामना करावा लागत असे,त्यामुळे कित्येकदा शेती पडीक ठेवण्याची वेळ देखील शेतकऱ्यावर येत होती. यासाठी वस्तीतील तरुणांनी एकत्र येऊन तहसीलदार व ग्रामपंचायत बेलसर यांच्याशी पत्रव्यवहार केला. तहसीलदार विक्रम राजपूत यांच्याबरोबर तरुणांनी चर्चा करून स्थळ पाहण्याची मागणी केली. त्यानुसार मंडल अधिकारी बापूसाहेब देवकर, माजी उपसरपंच धीरज जगताप, तलाठी सचिन जगताप, पोलिस पाटील पायल राऊत यांनी जागेवर जाऊन स्थळ पाहणी करून स्थानिक शेतकऱ्याबरोबर चर्चा करून यामध्ये मार्ग काढला.
यावेळी रस्त्यासाठी लागणारे क्षेत्र ज्या शेतकऱ्यांचे जाणार आहे. त्यांना त्या बदल्यात इतर शेतकऱ्यांनी ते क्षेत्र काढून द्यायचे सर्वानुमते ठरले व लगेचच रस्ता करायचे नियोजन करण्यात आले. जेसीबीच्या साह्याने रस्ता साफ करून वाहतुकीसाठी खुला करण्यात आला. तर सहा महिन्यांमध्ये सर्व शेतकऱ्यांनी आपले क्षेत्र मोजून रस्त्याची जागा निश्चित करण्याचे ठरविले. यामुळे तहसीलदार राजपूत, मंडलाधिकारी बापूसाहेब देवकर, माजी उपसरपंच धीरज जगताप, तलाठी सचिन जगताप, पोलिस पाटील पायल राऊत यांचे व सर्व तरुणांनी पुढाकार घेऊन केलेल्या उपक्रमाचे सर्वांनी स्वागत केले.

03158