जिल्ह्यातील मूल्यवर्धन प्रशिक्षण सुरू

खळद, ता. १८ : जिल्ह्यातील मूल्यवर्धन प्रशिक्षणाचा पहिला टप्पा सुरू झाला असून यामध्ये पुरंदर परिसरातील शिक्षकांचा समावेश आहे.
राज्य शैक्षणिक संशोधन व प्रशिक्षण परिषदेच्या समग्र शिक्षा अभियानांतर्गत मूल्यवर्धन प्रशिक्षणाचा पहिला टप्पा जिल्ह्यातील हिवरे, दिवे व जेजुरी येथे १८ ते २० नोव्हेंबर या तीन दिवसांत होणार असल्याची माहिती पुरंदरचे गट शिक्षणाधिकारी वैभव डुबल यांनी दिली. याबाबत सर्व केंद्र प्रमुखांना आपापल्या केंद्रातील शिक्षकांच्या उपस्थितीबाबतच्या सूचना केल्या आहेत. तसेच, या कालावधीत शिक्षकांची पर्यायी व्यवस्था करून एकही शाळा बंद राहणार नाही याची दक्षता घ्यावी. एक शिक्षकी शाळेतील शिक्षकांना तिसऱ्या टप्प्यात उपस्थित ठेवावे, असे त्यांनी पत्राद्वारे सूचित केले आहे.
जिल्ह्यातील शासकीय, स्थानिक स्वराज्य संस्था व अनुदानित मराठी, हिंदी आणि इंग्रजी माध्यमांच्या शाळांमधील इयत्ता पहिली ते आठवीच्या २३ हजार ७७८ शिक्षकांना प्रशिक्षण देण्यात येणार आहे, याबाबत पुणे जिल्हा शिक्षण व प्रशिक्षण संस्थेचे नामदेव शेडकर यांनी माहिती दिली होती. यासाठीच्या सुविधा आणि साहित्य उपलब्ध करून देण्याच्या सूचना त्यांनी गट शिक्षणाधिकारी व संबंधितांना केल्या आहेत.

पहिल्या टप्प्यात समाविष्ट शाळा व गावे
१) हिवरे हायस्कूल : चांबळी, गराडे, भिवडी, सुपे खुर्द, यादववाडी, माहूर, काळदरी, वीर
२) कातोबा हायस्कूल, दिवे : वाळूज, पिसर्वे, राजुरी, राजेवाडी, दिवे, सासवड नगरपालिका
३) जिजामाता इंग्लिश मिडीयम स्कूल, जेजुरी : नीरा, राख, वाल्हे, नाझरेसुपे, धालेवाडी