कळसमधील बॅंकेचे पाण्यात बसून कामकाज

कळस, ता. १२ ः बँक ऑफ महाराष्ट्र बँकेच्या कळस (ता. इंदापूर) शाखेचे कामकाज गेल्या काही दिवसांपासून पाण्यात बसून केले जात आहे. पावसामुळे इमारतीमध्ये दररोज पाणी साचत असल्याने बँक कर्मचाऱ्यांसह नागरिकांची मोठी परवड होत आहे.
गेल्या काही वर्षांपासून कर्मचाऱ्यांसह ग्राहकांची परवड सुरू असूनही यावर उपाययोजना करण्याकडे बँक प्रशासनाने दुर्लक्ष केले आहे. या इमारतीतील पाण्यामुळे बँकेची सुरक्षितता धोक्यात आली आहे. परिणामी बँकेतील पाण्याचा प्रश्न सोडविण्याची मागणी ग्राहकांकडून केली जात आहे. येथील ग्रामपंचायत कार्यालयाच्या इमारतीमध्ये बँक ऑफ महाराष्ट्र बँकेची शाखा आहे. कळस, रुई, न्हावी, डाळज, अकोले, निरगुडे यांसह अनेक वाड्यावस्त्यांवरील नागरिकांना या शाखेतून बँकिंग सुविधा मिळतात. सुमारे २५ हजारांहून अधिक ग्राहक या शाखेशी जोडले असल्याचे बोलले जात आहे. महिला बचत गट, शेतकरी, शालेय विद्यार्थी यांसह व्यावसायिकांना ही शाखा मोठी उपयोगाची ठरते. कोट्यवधींची उलाढाल असलेल्या या शाखेत येणाऱ्या ग्राहकांना मात्र पाण्यात उभा राहून बँकेतील कामाचा निपटारा करावा लागत आहे.
पावसाचे पाणी बँकेतील फरशीच्या खालून उफाळून येत आहे. याशिवाय भिंती पाझरत आहेत. त्यामुळे शाखेच्या इमारतीत सर्वत्र पाणी पसरलेले दिसते. बँकेचे काउंटर, विद्युत यंत्रणा, तिजोरी यांसह कर्मचाऱ्यांच्या खुर्च्या व ग्राहकांच्या बैठक व्यवस्थेसाठीच्या स्टूलखाली, असे सर्वत्र पाणी पसरते. पावसाच्या पाण्याचा बंदोबस्त करण्याची मागणी ग्राहकांकडून केली जात आहे.