विद्यार्थ्यांनी ध्येय ठेवून प्रयत्न करावेत : कृषीमंत्री भरणे

कळस, ता. १९ : ‘‘विद्यार्थ्यांनी ध्येय ठेवून प्रयत्न करणे गरजेचे आहे. मनात भीती व न्यूनगंड न ठेवता वेगळं शिकण्याची कला अवगत करावी. माहिती व तंत्रज्ञानाच्या युगात स्पर्धा मोठी आहे. या अनुषंगाने येणारा काळ हुशार विद्यार्थ्यांसाठी सुकाळ ठरेल. प्रबळ इच्छाशक्तीने दगडातून पाणी काढण्याची क्षमता निर्माण करा,’’ असा सल्ला कृषिमंत्री दत्तात्रेय भरणे यांनी विद्यार्थ्यांना दिला.
रुई (ता. इंदापूर) येथील श्री बाबीर विद्यालयात आयोजित केलेल्या ५३ व्या तालुकास्तरीय बाल वैज्ञानिक प्रदर्शनाचे उद्‍घाटन कृषिमंत्री भरणे यांच्या हस्ते केले. यावेळी उपस्थित विद्यार्थ्यांना त्यांनी मार्गदर्शन केले. यावेळी कार्यक्रमास बिल्ट कंपनीचे उपव्यवस्थापक विजयसिंह पाटील, शिक्षणाधिकारी डॉ. भाऊसाहेब कारेकर, गटविकास अधिकारी सचिन खुडे, गटशिक्षणाधिकारी नीलेश गवळी, कर्मवीर शिक्षण संस्थेचे अध्यक्ष अमरसिंह पाटील, उपाध्यक्ष उदयसिंह पाटील, बाबीर देवस्थान ट्रस्टचे अध्यक्ष अजितसिंह पाटील, शिक्षण विस्तार अधिकारी सुनील मुंगळे, केंद्रप्रमुख बाळासाहेब डांगे, मुख्याध्यापक संघाचे सचिव नंदकुमार सागर, रामराव पाडुळे, प्रसाद गायकवाड, जगन्नाथ पाटील, पद्माकर लावंड, संतोष आगरकर, मेहमूद मुलाणी, रामदास काळे, उद्धव नागरगोजे यांसह विविध शाळांचे मुख्याध्यापक, विज्ञान व गणित विषयांचे शिक्षक व विद्यार्थी उपस्थित होते. बाबीर विद्यालयाचे मुख्याध्यापक जे. एन. पाटील यांनी प्रास्ताविक, तर संतोष हेगडे यांनी सूत्रसंचालन केले. धनाजी गावडे यांनी आभार मानले.

विज्ञान प्रदर्शनात १४० हून अधिक प्रकल्प
या बाल वैज्ञानिक प्रदर्शनात तालुक्यातील ६६ माध्यमिक शाळा, २ आश्रम शाळा, ३ प्राथमिक शाळा अशा सुमारे ७१ शाळांनी सहभाग घेतला आहे. दोन दिवस चालणाऱ्या या प्रदर्शनात या शाळेतील विद्यार्थ्यांनी सुमारे १४० हून अधिक प्रकल्प सादर केले आहेत.