पळसदेव येथे भाजीपाला खरेदीसाठी गर्दी

पळसदेव, ता. १२ ः मातीच्या सुगड्यापासून ते चुडा- पाटल्यापर्यंत, खणाच्या हळकुंड- सुपारीपासून ते तिळाच्या लाडूपर्यंत, गावरान बोरांपासून ते घेवड्याच्या शेंगापर्यंत असे सर्वकाही विक्री करणाऱ्या विक्रेत्यांनी खचाखच भरलेल्या पळसदेव (ता. इंदापूर) येथील आठवडे बाजारात महिलांनी मकरसंक्रांतीच्या पूर्वसंधेला खरेदीसाठी गर्दी केली होती. यंदा सर्व साहित्य स्वस्त असूनही ग्राहकांचा अपेक्षेएवढा प्रतिसाद मिळत नसल्याची प्रतिक्रिया काही विक्रेत्यांनी व्यक्त केली.
परिसरातील नऊ वाड्यावस्त्या व काही गावांसाठी येथील आठवडे बाजार महत्त्वाचा आहे. मंगळवारी (ता. १३) भोगी व बुधवारी (ता. १४) मकर संक्रातीचा सण असल्याने, बाजारात खरेदीसाठी महिलांची विशेष गर्दी झाली होती. मकर संक्रातीचा सण महिलांमधून मोठ्या उत्साहाने साजरा केला जातो.